Mittarfiit ilungersunartorsiornerat nunanut allanut angalaniartunut akitsuisoqarneranik kinguneqartoq
Kalaallit Nunaanniit timmisartumik angalaneq januaarip aallaqqaataanit akisunerulissaaq.
Greenland Airportsip, Kalaallit Nunaanni mittarfiit 13-it ingerlatarisaani, nunanut allanut angalasunut akitsuut januaarip aallaqqaataaniit atuutilissasoq, suliffeqarfik tusagassiuutinut nalunaaruteqarluni taama ilisimatitsivoq.
Akitsuut timmisartuutileqatigiiffiit aqqutigalugit akilerneqartartoq bilitsillu akianut ilanngunneqartartoq ukiuunerani 872 koruuninngorlugu, aasaaneranilu 1.182 koruuninngorlugu akitsussaaq.
Akitsuut maannamut ukiumut 548 koruuniusimasoq, Sermitsiamit allaaserineqarpoq.
Akitsuut timmisartuussinerni tamani akilerneqartassaaq, Tunulli mittarfianut Nerlerit Inaataannut akitsuut atuutinngilaq.
Kalaallit Nunaanni mittarfiit ingerlanneqarneranni aningaasartuutit amerlasuut matussuserniarlugit akitsuisoqarpoq.
Greenland Airportsimi aningaasaqarnermut pisortaq Per S. Trærup tusagassiuutinut nalunaarummi oqaaseqarpoq:
-Soorunami akitsuutit atorunnaarsinnissaat aamma angalanerit amerlineqarnissaat kissaatiginerpaavarput. Kisianni piumasaqaatit annertusiartornerat taakkulu aningaasartuutaat pissutigalugit akitsueqqinnissaq ajoraluartumik pisariaqalersimavoq, Per S. Trærup oqarpoq.
Isumannaallisaanermut piumasaqaatit amerlineri akitsuinermut pissutaasoq, suliffeqarfiup paasissutissiissutigaa
Assersuutigalugu Nuummi mittarfimmi isumannaallisaanermut sulisut naatsorsuutigineqartunit pingasoriaammik amerlanerupput.
Angallannermut Aqutsisoqarfik Kalaallit Nunaanni mittarfinnik nakkutilliisarpoq, ukiunilu kingullerni arlaleriarluni isumannaallisaanermut piumasaqaatit sakkortusitissimallugit.
Aningaasartuutit amerliartornerat Greenland Airportsip naatsorsuutaani aamma takuneqarsinnaavoq.
Suliffeqarfik 2,7 milliardit koruuninik 2025-mi amigartooruteqarpoq.
Tamanna aningaasartuuteqarnerulernerup saniatigut mittarfinni sullissinerup naatsorsuutigineqartumit ikinnerunerinik aamma pissuteqarpoq.
Kalaallit Nunaanni Namminersorlutik Oqartussat suliffeqarfimmi amerlanerussuteqarlutik piginnittuupput, Naalakkersuisullu akitsuutit nutaat akuersissutigisimagaat Greenland Airports ilisimatitsivoq.
Kalaallit Nunaanni Naalakkersuisut siulittaasuat, Jens-Frederik Nielsen, Greenland Airportsip 2025-mut naatsorsuutinik aasaanerani saqqummiussinerata kingorna isornartorsiuivoq.
-Naalakkersuisut ingerlatseqatigiiffiup suut ajutoorfiunersut unneqqarissumik ersarissumillu isummerfigissagai nassuerutiginninnerullu iliuuseqarfigineqarnissaa naatsorsuutigaat, Jens-Frederik Nielsen Greenland Airportsip naatsorsuutaanik aasaq saqqummiussai pillugit ilaatigut taama oqarpoq.