Misissuineq: Europamiut quliugaangata qulingiluat USA ilitut isiginngikkaat
Europamiut USA-mik ilimisut isiginnittut akuttupput. Europamilu nunani 15-ini amerlanerussuteqartut nunartik saassunneqarpat Amerikamiunit ikiorneqarumaanertik upperinngilaat.
Tamanna Isumasioqatigiit European Council on Foreign Relations (ECFR) sinnerlugit misissuinermit paasinarsivoq, tuluit tusagassiorfiat The Guardian allappoq.
Akissuteqartut quliugaangata ataatsip USA ilitut isigaa.
Allatut oqaatigalugu: Inuit quliugaangata qulingiluat USA ilitut ilisinngilaat, naak USA illersornissamut isumaqatigiissummut Natomut, Europami nunat amerlanerit assigalugit, peqataagaluartoq.
Inuit 19.481-it nunanit 15-ineersut misissuinermi maajimi suliarineqartumi peqataapput.
Misissuinermi akissuteqartut Bulgariami, Danmarkimi, Estlandimi, Frankrigimi, Hollandimi, Italiami, Polenimi, Portugalimi, Schweizimi, Spaniami, Tuluit Nunaanni, Sverigemi, Tysklandimi, Ungarnimi Østrigimilu najugaqartuupput.
Nunani taakkunani ikinnerussuteqartut nunartik avataanit saassunneqaraluarpat USA-mit illersorneqarnissartik naatsorsuutigigalugu akissuteqarput.
Nunani taakkunani 15-iusuni Polen Amerikamiunik tatiginninnerpaapput. Polenimi akissuteqartut 37 procentiisa USA-mit illersorneqarnissartik upperaat.
Spaniamiut USA-mik tatiginninnginnerpaajupput. Spaniami akissuteqartut 12 procentiisa, saassunneqaraluarunik USA-p akuliunnissaa naatsorsuutigaat.
Europamiut sakkussiaannik pisiortussasut
Danmarkimi akissuteqartut 20 procentii - imaluunniit tallimagaangata ataaseq -saassunneqaraluarnik USA-mit illersorneqarnissartik naatsorsuutigaat.
Nunani amerlanerni amerlanerussuteqartut isumaqarput sakkutuut sakkussianik sorsuutinillu USA-meersunik pisariaqartitsinnginnerusariaqartut.
Danmark, Holland Sverigelu sakkussiassanik Europameersunik pisinissamut tapersersuinerpaapput.
Taakkunani akissuteqartut 75 procentii, 72 procentii aamma 70 procentii isumaqarput nunagisami sakkussiat USA-miit Europallu avataaneersut pinnagit, sakkussiat Europameersut pisiarisariaqaraat.
USA-p præsidentiata Donald Trumpip 2025-mi januaarimi præsidentitut aappassaanik ivertinneqarneraniilli USA-p Natomi iliminik illersuerusussuseqarnera arlaleriarluni apeqquserneqartarpoq.
Aammattaaq Trumpip illersornissamut isumaqatigiissuteqaqataasut allat illersornissaqarnermut aningaasaliinngippallaarnerarlugit isornartorsiorpai.
Trumpip USA-p Kalaallit Nunaannik tiguaasariaqarneranik oqalunnera Europamilu nunanik USA-p Israelillu Iranimut sorsunnerannut peqataajumannginnerat pillugu isornartorsiuinera, USA-p Natomilu nunat allat suleqatigiinniarnerannut akornusiivoq.
/ritzau/
