Mellembølgekkut aallakaatitsiviit atuutilerseqqinneqassapput
Tamanna atuarneqarsinnaavoq Inatsisartunut ilaasortap Ruth Heilmannip § 37 naapertorlugu apeqquteqaataanut Peqqissutsimut Attaveqarnermullu Naalakkersuisup Steen Lyngep akissuteqarneratigut.
Mellembølge atorlugu aallakaatitsivik 2012-imi atorunnaarsinneqarmat, aalisartut, piniartut, umiartortut kujataanilu savaatillit naammagittaalliorput FM atorlugu nassitsissutip avataani radiomik tusarnaarsinnaajunnaaramik.
Tamatuma kingorna politikerit qisuariarput maannalu tassa mellembølgi atorlugu sakkortusaaviit aallakaatitsinerat aallarteqqittussanngorput.
Aallakaatitsissutit ukiormanna atuutilerseqqinneqassapput
Mellembølge atorlugu nassitsissut Qeqetarsuarmiittoq siulliulluni aallakaatitsisalissaaq tassalu ukioq manna oktobarip qaammaataanit decembarip qaammataata tungaanut.
Mellembølgekkut aallakaatitsivik Nuup eqqaani Kitsissuniittoq aappaagu jannuaarip qaammataanit marsip qaammataata tungaanut aallakaatitsisalissaaq kingulliulluni Simiutaq Qaqortup eqqaaniittoq aappaagu juunip aallaqqaataanit aallakaatitsisarnini aallartissallugu.
Tamatuma saniatigut Nuup Kangerluani Qingaami FM-ikkut aallakaatitsissut 1. juni 2014-imi aallartinneqarsimavoq
AAMMA ATUARUK Livsfarlig lukning
Naalakkersuisup Steen Lynge akissuteqarnermini erseqqissaatigaa imaatigut attaveqarfiginneriaatsip aappaa tassaasoq mellembølgi atorlugu attaveqarfiginneriaaseq, taannalu sinerissamit avammut 400 km tikillugu aamma kangerluit amerlanersaanni ilanngullugit tusaaneqarsinnaasoq.
Attaveqarfiginneriaaseq taanna mellembølgikkut nassitsissutinut KNR-ip atortagaanut attuumassuteqanngitsoq Naalakkersuisup akissuteqaataani atuarneqarsinnavoq.
VHF imaani kiisalu sumiiffinni inuussutissarsiutigalugu umiartorfiusuni sunngiffimmiluunniit imaatigut annertuumik angallaffiusuni atugassatut aaqqissuussaavoq. Tusaaneqarfigisinnaasaata isorartussusia tassa 30 sømilit missaannik isortartutigivoq.
Ingerlatseriaaserli taanna nunap iluatigut aqqutini kangerlunnilu tamakkiisumik atorneqarsinnaasutut aaqqissuussaanngilaq. Tamanna antennit “imminnut takusinnaasussaanerannik” pissuteqarneruvoq, Attaveqarnermut Naalakkersuisoq Steen Lynge akissuteqarluni taama allappoq.
