Magde meeqqat qaannamik pissartanngorniunneranni bronzennattoq
Nunatsinni qaannamik ulluni makkunani unammersuartoqaleruttorpoq. Qaannamik parrunneq, kinngusaqattaarneq allunaariaqattaarnerlu unammissutigineqarlutik.
Meeqqat peqataasut ilaat KNR-imit naapippagut.
Taakku ilagaat arfineq pingasunik ukiulik Qaqortumiit unammiartortoq Magde Gedionsen Larsen, taanna siorna qajartorluni misileeqqaarpoq:
Aatsaavissuaq unammeqataavit?
- Aap.
Magde Gedionsen Larsenilu aatsaat unammeqataagaluarluni bronzennareerpoq.
Qajartorluni suna nuannernerpaava?
- Allunaariarluni, taanna oqarpoq.
Magde Gedionsen Larsenip arnaa Lis Margrethe Larsen tulluusimaarluni KNR-imut oqaatigaa:
Meeqqatit marluk qaannamik unammersuarput massakkut, qanoq misinnarpa?
- Tulluusimaarnaqaaq nuanneqaaq. Iggiarlulaarpunga ippassaq illersuinikuugatta aamma ullumikkut illersuigatta. Misigisaq nuanneqaaq aamma meeqqat qanoq piginnaasaqartiginersut isigalugit nuanneqaaq tapersersorlugit, Lis Margrethe Larsen oqarpoq.
Milan Reimerili aatsaat unammeqataalinngilaq taannami 2017-mili qajartortalerpoq.
Kia qajartornermik ilinniartippaatit?
- Aajukkut, ajakkut ilaquttamalu, Milan Reimer 19-inik ukiulik Ilulissaniit unammiartortoq oqarpoq.
Peqataasareernikuugavit massakkut peqataaqqilerputit qanoq ippa?
- Pissanganarpoq, taanna oqarpoq.
Sisimiuniilli unammiartortut ilaat tallimanik ukiulik Arnu Olsen aatsaat peqataarngaarlunilu qajartortaleqqammerpoq.
Qanga qajartortaleravit?
- Aatsaat.
Kia qajartornermik ilitsersuuppaatit?
- Uularik, taanna oqarpoq.
Aatsaat unammeqataavutit qajartorluni suna nuannernerpaava?
- Sukkaniulluni. (Aaqq. Qaannamik parrunneq)
Massakkut unammiliivipputit qanoq ippit pissangavit?
- Ija, Arnu Olsen oqarpoq.
Qaannamik unammersuarnerit toqqaannartumik KNR-ikkut malinnaaffigisinnaavatit, tassani meeqqat sisamanngornermi tallimanngornermilu unammissapput.
