Kalaallit Nunaat pillugu "pitsaasumik suliniuteqartoqarpoq".

Natop qullersaa Mark Rutte Ankarami Natop pingasunngornermi ataatsimeersuartitsineranut isilerluni taama oqarpoq.

USA-p præsidentiata Donald Trumpip Ankarami Kalaallit Nunaata tigunissaanik kissaateqarnini marlunngornermi uteqqereeraalu taama nalunaaruteqarpoq.

Ruttep Trump Kalaallit Nunaata pigilernissaanik anguniagaqarnani Issittumi isumannaallisaanerup nukittorsarneqarnissaanik ukkataqalernissaanut Davosimi World Economic Forum-ip upernaaq ataatsimiinnerani isumaqataalersippaa.

Trumpilli piumasaqaatini, Tyrkiap præsidentia Erdogan, Nato-p Ankarami ataatsimeersuarnerani qaaqqusisoq, ataatsimeeqatigereerlugu oqaatigeqqimmagu, akerleriinneq marlunngornermi aallarteqqippoq.

- Kalaallit Nunaat Danmarkimit nakkutigineqarnani USA-mit nakkutigineqartariaqarpoq, Trump marlunngornermi oqarpoq. 

Ukiup aallartinnerani akerleriissutigineqartutut, Danmark Kalaallit Nunaata illersorniarnerani naammattumik iliuuseqannginnerarlugu taama oqarnermini, isornartorsioqqippaa.

- Kalaallit Nunaata Danmark ikiunngilaa. Danmarkip Kalaallit Nunaannut ikiuinissaminut aningaasartuutit naammanngitsut atortarpai, tamannali USA-mut pingaaruteqarpoq, Trump oqarpoq.

Sakkutuunik utertitsisinnaasoq

Præsidentip Kalaallit Nunaat "Kinamiunit Ruslandimiillu umiarsuarnit unguneqarsimanera" aamma oqaatigeqqippaa.

Trumpili aamma oqarpoq Danmarkip Kalaallit Nunaata Amerikamiutut inissisimalernissaa “akueriumanngikkaa”.

- Ruslandimut atatillugu aningaasaatigut tamaasa atorlugit ikiuinitsinni... Aningaasanik atuisariaqanngikkaluarpugut... Sakkutuujutigut tamaasa Europamit utertissinnaavagut, taanna oqarpoq.

Ministeriuneq Mette Frederiksen (Socialdemokratiet) Kalaallit Nunaat tuniniarneqanngitsoq, Ankaramut tikikkami erseqqissarpaa.

- Kalaallit Nunaat soorunalimi tuniniagaanngilaq. Tamanna aallaqqaammulli erseqqissumik oqaatigaarput, Mette Frederiksen Ankarami oqarpoq.

Mette Frederiksen NATOp ataatsimeersuartitsineranut peqataasoq. Assi © : Alastair Grant/Reuters/Ritzau Scanpix

Taassuma Donald Trumpip "Kalaallit Nunaannik piginnikkumanera tiguaajumaneralu” “ilisimalluarneqartutut” oqaatigaa.

Tamannali Danmarkimi naalakkersuisunit itigartitsissutaalluinnarpoq:

- Taama pisoqassanngilaq. Kalaallit Nunaat USA-mut ilaarusunnani erseqqissumik oqarpoq. Kikkullu tamarmik kunngeqarfimmik oqartussaassuseqarnerput ataqqinninnissaat naatsorsuutigaara, Mette Frederiksen oqarpoq.

Kalaallit Nunaat tuniniagaanngilaq

Donald Trumpip taamatut oqarnera Kalaallit Nunaannut Danmarkimullu piffissami ajuusaarnartumi pivoq.

Danmarkip Amerikamiut timmisartuinik alapernaarsuutaasunik P-8A Poseidoninik marlunnik pisiniarnermi milliardilikkaanik aningaasaliissuteqarnini marlunngornermi nalunaarutigaa. Taakkua Issittumi Atlantikullu Avannaani nakutilliissapput.

Kisiannili pisineq Issittumilu nakkutilliilluarnerulernissaq Trumpimut saammarsaataalluarsimanngivipput.

- Issittumi isumannaallisaanissaq pillugu Amerikamiut suleqatigilluarpagut. Tamanna ineriartortikkusupparput. Aamma tamatuminnga apeqqummik misissuisumik maanna suleqatigiissitaqarpoq. Kalaallit Nunaalli tuniniarneqanngilaq, Mette Frederiksen oqarpoq.

Mette Frederiksenip, Danmarkip - Donald Trumpip piumasaqarnerata kingorna - Natop nunap aningaasartaasa 5 procentiisa illersornissamut atorneqartarnissaannik anguniagaqarnera naapertorlugu, naammassinnipajaarsimanera erseqqissaatigaa.

Taamaattumik Natomi nunat akornanni akerleriinnerit pinnagit nunanit allanit qunusaarinerit isiginiarneqarnerusariaqarput:

- Natop avataani amerlasuunik akeraqarpugut. Natop iluani akerariinnissaq pisariaqartinngilarput, Mette Frederiksen oqarpoq.

RITZAU