Løkke: USA Danmarkilu Kalaallit Nunaat pillugu siunnerfeqatigiittoqalerpoq
Kalaallit Nunaat pillugu suleqatigiissitap USA-mik ataatsimeeqateqarnera siulleq ima ingerlalluartigaaq illuatungeriit “oqaluuserineqarsimasunut uteqqillutik".
Suleqatigiissitat Washington D.C-mi siullermeersumik ataatsimiinnerat pillugu, nunanut allanut ministeri Lars Løkke Rasmussen (M) taama oqarpoq.
- Nunanut allanut ministerip Marco Rubiop ippassaq oqaasii uppernarsaannarsinnaavakka. Atorfilittat qullersaat Washingtonimi ataatsimeeqatigeeqqimmata.
- Ataatsimeeqatigiilluartoqarpoq. Ataatsimiinneq anguniagaqarfiusorujussuuvoq oqaloqatigilluartoqarlunilu. Ataatsimiinnissat tullii isumaqatigiissutigineqarput. Imaanngilaq ataatsimiinnermi aaqqiissuteqarluta. Pitsaavorli. Taamaalilluta Washingtonimi oqaluuserineqarsimasunut uteqqissinnaalerpugut, Lars Løkke Rasmussen oqarpoq.
Løkkep oqaaseq “oqaluuserineqarsimasunut uteqqinneq" isumaqartippaa, suleqatigiissitap aaqqiissutissanik periarfissarsiuilluni ataatsimiinnermini isumaqatigiissutigisaa, iluatsittumik maanna uterfigineqartoq. Løkkep ullut 15-it matuma siorna isumaqatigiissuteqarfigisaa, Washingtonimiitsilluni.
- Tamatuma kingorna allamut sangusoqarpoq pissutsillu ajorsiariarlutik. Maannali oqaluuserineqarsimasunut uteqqippugut. Arlaleriarlungalu oqaatigeriikkattut, USA-p isumannaallisaanermut tunngasunik isumakuluutai uagut soorunami aamma isumakuluutigaagut.
- Natomi qanimut suleqatigiinnikkut USA-llu, Kalaallit Nunaata Danmarkillu oqaloqatigiinneratigut tamanna aaqqikkusupparput, Lars Løkke Rasmussen oqarpoq.
Isumalluarnerulaartoq
Løkkep oqarnera naapertorlugu, illuatungeriit “angusaqarfiusussamik oqaloqatigiinnissartik” Washingtonimi isumaqatigiissutigaat, taamaaliornikkut Amerikamiut isumannaallisaanikkut soqutigisaat piviusunngortinneqarlutillu Kunngeqarfiup “killigititai aappaluttut” ataqqineqassammata, tassaasut “nammineq oqartussaassuseqarnerput ataatsimullu killeqarfeqarneq kalaallillu namminneq aalajangiisinnaatitaanerat”.
- Sulili inerniliussaqarsinnaanngilagut sapaatip-akunneratali siulianut naleqqiullugu isumalluarnerulaarpunga, Lars Løkke Rasmussen Washington D.C.-mi pingasunngormat ataatsimiinneq pillugu oqarpoq.
Suleqatigiissitaliaq Washingtonimi Lars Løkke Rasmussenip, Kalaallit Nunaata nunanut allanut ministeriata Vivian Motzfeldtip USA-llu præsidentiata tullersortaa J.D. Vancep USA-llu nunanut allanut ministeriata Marco Rubiop januaarip 14-ianni ataatsimiinneranni isumaqatigiissutigineqarpoq.
Trumpip atorfilittaasa isumaqatigiissutigineqartoq sakkortuumik aqaguani sioorasaarutigilerpaat Kalaallit Nunaannik tiguaaniarlutik.
Tusagassiortunik januaarip 15-ianni katersortitsinermi præsidentip illorsuani tusagassiisartoq Karoline Leavitt oqarpoq, suleqatigiissitat “Kalaallit Nunaata tiguarneqarneqarnissaanut tunngatillugu teknikkikkut tunngasumik oqaloqatigiissutissatik nangeqqiinnassagaat”.
Taassuma taama oqarnera Lars Løkke Rasmussenip ilumuunnginnerartariaqarlugu nalunaarutigivaa.
Suli aaqqiissutissarsisoqanngitsoq
USA-lli præsidentiata Donald Trumpip, Danmark Europamilu nunat allat arfineq-marluk, USA-p Kalaallit Nunaat pigilinngippagu nunat taakkartugai akitsuuteqarnerulersinniarlugit sioorasaarmagit, pissutsit ajorsiartulerput.
EU-p taamaattoqarnerata kingunerisaanik qanoq akisinnaanertik oqaloqatigiissutigilerpaat. Frankrigip præsidentiata Emmanuel Macronip EU-p USA-mut niuernikkut saassussinissamut atortussaanik atuinissaq ilaatigut eqqartorpaa.
Taamaattumik EU USA-lu niuernikkut sorsoqqajaaleraluarput.
Trumpilli Natop qullersaa Mark Rutte Issittumi isumannaallisaanerup nukittorsarneqarnissaa pillugu Schweizimi Davosimi Nunarsuarmi Aningaasaqarnermut Oqalliffiup ataatsimeersuartitsinerani isumaqatigiissuteqarfigaa.
Trumpip akitsuutinik siorasaarinini taamaatissallugu aamma akueraa, taamaalillunilu Washington D.C-mi suleqatigiissitaq Løkkep Motzfeldtillu illoqarfimmut januaarip aallartinnerani tikeraarnerisa kingorna sulileqqippoq.
- Tamanna nuannerpoq, isumatusaartumillu oqaloqatigiilernerput nuannaarutigivissorpara, oqaloqatigiillualernittalu qanoq kinguneqarsinnaanera isumaliutigalugu ilungersuanartumut peqqinnissaa kissaatiginngilara.
- Suliaq suli aaqqiivigineqanngilaq, aallartippugulli anguniagaqarfiussaarlu, Lars Løkke Rasmussen oqarpoq.
/ritzau/