USA-p nunanut allanut tunngasunut ministeria: Kalaallit Nunaannut tunngasut pillugit inissisimalluarpugut

Kalaallit Nunaat pillugu USA-p inissisimanera maannakkut ajungitsuusoq, nunanut allanut tunngasuntu ministeri Marco Rubio USA-mi senatimi pingasunngornermi pisortatigoortumik tusarniaasoqarnerani oqarpoq.

Sulineq ingerlanneqarpoq tamannalu tamatsinnut ajunngitsumik naammassineqarumaarluni, ministeri ilassuteqarluni oqarpoq.

- Allaat maanna oqaloqatigiinnitta pinerani, ajornartorsiut taanna pillugu Kalaallit Nunaanni Danmarkimilu suleqatigut periusissiat pillugit ataatsimiipput, suliallu tamatsinnut ajunngitsumik naammassineqarnissaat naatsorsuutigaara, Rubio senatimi tusarniaanermi oqarpoq

- Ajunngitsumik iliuuseqartugut isumaqarpunga, suliallu qaffasissumik ajornanngitsumillu aallartissavagut. Sulineq ullumi aallartippoq tassanngalu suliaqarneq uteqqiaffigineqassaaq.

Isumaqatiginninniarnerit pineri tamaasa tusagassiorfinni annertuuliorfigineqarnissaa pinngitsoortinniarneqarmat, Rubiop erseqqissaatigaa.

- Isumaqarpunga pitsaasumik inerneqarumaartoq, isumaqarpungalu Europami suleqatitsinnit taamatut qanittukkut aamma tusarumaartugut, taanna oqarpoq.

Amerikamiut, danskit kalaallillu isumaqatigiinniartartuisa Kalaallit Nunaat pillugu ataatsimeersuarnerit marlunngormat aallartissimagaat, tusarfiit atersineqanngitsut DR-imut oqaluttuarput.

Tusagassiorfik pingasunngornermi taama allappoq.

USA-p præsidentiata Donald Trumpip sapaatip akunnerani kingullermi Davosimi World Economic Forumimi Kalaallit Nunaat sakkulersorluni tiguarniarnagu oqareernerata kingorna taama nalunaaruteqartoqarpoq.

Kalaallit Nunaata tiguarsinnaanera pillugu isumaqatigiinniarnissani qanittukkut aallartinniarsariniarlugu, Trumpip aamma oqaatigaa.

NATO-p generalsekræteria Mark Rutte peqatigalugu Kalaallit Nunaat pillugu siunissami isumaqatigiissusiornissamut sinaakkutissat isumaqatigiissutigisimallugu Trumpip tamatuma kingorna oqaatigaa.