Kalaallit namminneq siunissaminnik aalajangiisinnaassuseqarnerat, Kalaallit Nunaatalu Danmarkip ilaaniinnera USA-mit ataqqineqartariaqarpoq.

Danmarkip nunanut allanut tunngasunut ministeria Lars Løkke Rasmussen(M), USA-p Kalaallit Nunaannut immikkut sinniisussamik toqqaanerata kingorna taama oqarpoq.

USA ataasinngornermut unnuaani taama nalunaaruteqarpoq, USA-llu Kalaallit Nunaannik suli soqutiginninneranik tamanna takutitsinerulluni.

- Taama toqqaasoqarnerata takutippaa USA Kalaallit Nunaannik suli soqutiginnittoq. Tamattali - aamma USA - Kunngeqarfiup Danmarkip oqartussaaffiinik ataqqinnissasugut isumaqarpugut, Lars Løkke Rasmussen taama allappoq.

USA-mi naalagaaffimmi Louisianami guvernøri Jeff Landry, Kalaallit Nunaannut immikkut sinniisussatut USA-p præsidentiata Donald Trumpip toqqarpaa.

Jeff Landry 54-inik ukioqarpoq, siornatigullu politiullunilu suliffeqarfiuteqarpoq.

Kalaallit Nunaata USA-p isumannaatsuunissaanut pingaaruteqarnera Landryp ilisimalluaraa Trumpip oqaatigaa.

Kalaallit Nunaata USA-p isumannaatsuunissaanut pingaaruteqarluinnarnerarlugu USA-mit aqunneqartariaqarnera, Donald Trumpip arlaleriarluni oqaatigisareerpaa.

Politikkikkut aalassatitsinerit 

Isumannaallisaanermut tunngasut pissutigalugit USA-p Kalaallit Nunaat tiguartariaqaraa, Donald Trump arlaleriarluni oqartarpoq.

Kalaallit Nunaat aqussinnaajumallugu sakkutuulersornissaq tunuarsimaarfigiumanagu aamma Trump oqartarpoq.

Taama oqaaseqarnera nunani tamalaani politikkikkut uivertitsipput, aamma USA-p Danmarkillu Kunngeqarfiata akornanni pissutsinik piffissap ilaani ilungersunartumik inissittoqarneranut pissutaaqataallutik.

Kalaallit Nunaat USA-p nunarsuullu sinnerata isumannaatsuunissaanut pingaaruteqarluinnartoq, Kalaallit Nunaallu USA-mit pigineqalerlunilu aqunneqartariaqalersoq, Donald Trump inoqatinut nammineq attaveqaqatigiittarfimmini Truth Socialimi ukiup ataatsip matuma siornatigut allappoq.

Tamanna Kalaallit Nunaanni Danmarkimilu aalassatsitsivoq, Kalaallit Nunaatalu Danmarkillu qaninnerulernerannik kinguneqarluni, Danmarkillu Kalaallit Nunaannik pingaarnerutitsilerneranik aamma kinguneqarluni. Soorlu aamma Danmarkip nunatsinnut aningaasaliineruneranik tikeraartoqarneranillu kinguneqartoq.

Assersuutigalugu Danmarkip ministeriunera Mette Frederiksen(S), Kunngi Frederik, ministerit arlallit Frankrigillu præsidentia Emmanuel Macron nunatsinnut ukiup massuma ingerlanerani tikeraarput.

/ritzau/