Lars Løkke: Kalaallit Nunaat qulangerlugu iliuuseqartoqanngitsoq

- Kalaallit Nunaat pillugu itinerusumik oqaluuserinninngilagut, oqaasinnaaqarpugummi: Kalaallit Nunaat peqataatinnagu Kalaallit Nunaat pineqassanngilaq.

Danskit nunanut allanut ministeriat, Lars Løkke Rasmussen (M) amerikamiumik illuatungerisaminik Washingtonimi isumassarsiornermik suliffeqarfimmut CSIS-imut sapaatip akunnerata siuliani pulaarnermini oqaloqateqarami Kalaallit Nunaat initusimanersoq aperineqarami oqarpoq.

Naalli ataatsimiittarfinni Kalaallit Nunaat pingaarnerpaatut oqaluuserisassaniinngikkaluartoq issittoq Danmarkip USA-llu sillimaniarnermi politikkianni pingaaruteqarnerpaat ilaanniilersimavoq.

Issittoq Berlinip qarmarsuata uppisinneqarneraniilli sakkuaaffiunngitsuusimagaluarpoq – aamma amerikamiunut.

USA sorsunnersuup nillertup nalaani Kalaallit Nunaanni 17-it missaannik sakkutooqarfeqarpoq. Sakkutooqarfik ullumikkut ataasiinnaavoq.

- Sumiiffimmi nipaatsumik ingerlatsinissaq ukiorpassuarni ataatsimut periuserisimavarput, Lars Løkke Rasmussen oqaloqatigiinnermi Troels Lund Poulsenip (V) aamma najuuffigisaani oqarpoq.

Avannarpasinnerpaami aarlerinartut nutaat

Sikuli aakkiartortoq, Ruslandip sakkutooqarnikkut suliaqarnerunera, Kinap soqutiginnikkaluttuinnarnera – pissutsinut allannguipput.

Taamaammat Danmark timmisartuaqqanut ungasianiit aquttakkanut fregatinullu nutaanut siornali aningaasaliisalerpoq.

- Sumiiffimmi isorartulluinnartumi susoqarneranik ataatsimut takunnissinnaanerulernissatsinnut aningaasaliinerusariaqarluta siornali oktobarimi, novembarimi decembarimilu aalajangereernikuuarput, Troels Lund Poulsen oqarpoq.

Taassuma oqarnera naapertorlugu aalajangiinernit amerlasuut tamat oqallinneranni maanna initungaatsiartut Trumpip Kalaallit Nunaannik piserusunnermik nalunaaruteqarnissaa sioqqutingaatsiarluguli aalajangerneqarnikuupput.

USA-p nunarput ukkatarigaa

Danmarkip, Norgep Canadallu Issittumi allanngoriartortoqalersoq sivisuumik ilisimareerpaat – USA-milu præsidentip illorsuani maanna naalakkersuisut aatsaat ukkatarinnilersut, Lars Løkke Rasmussenip oqaloqatigiinnermi oqaatigaa.

Taamaammat Kalaallit Nunaata USA-p sillimaniarnermut politikiani ukkatarineqaleriataarnera danskit naalakkersuisuisa aamma tupaallaatigaat.

- USA-p sillimaniarnerminut Kalaallit Nunaannik pisariaqartitsileriataarnera – tiguaallunilu aaqqiissuteqartoqarniarnera aamma tupaallaatigaarput.

Issittup oqaluuserisassaaniilernissaa Danmarkip NATO-mi juunimi ataatsimeersuartoqarnerani ilungersuutigaa. Tamanna iluatsippoq – apeqqulli suli matuneqanngilaq.

- Kalaallit Nunaannut tunngatillugu apeqqut aaqqiissuteqarfigineqanngilaq. Trumpip akunnaatsuliorluni tunngavilersuutai eqqaassanngikkaanni USA-mik anginerulersitsinissamik takorluuiinnarsinnaaneranik eqqarsaateqarneq eqqarsaatigiunnaarsinnaanngilara – tamannalu soorunami akuerisinnaanngilarput, Lars Løkke Rasmussen oqarpoq.

Naalli Lars Løkke Rasmussenip amerikamiut Kalaallit Nunaanni sakkutooqarnikkut suliaqarnissaat itigartitsissutigeqqammeraluaraa ineriartorneq ersarippoq.

- Issittumi sakkutooqarnikkut toqqaannartumik maanna aarlerinartoqanngilaq, kisianni nunat ilaat suliaqarnerulersut takusinnaavarput. Taamaammat siunissamut piareersimanerusariaqarpugut, Lars Løkke Rasmussen Washingtonimi naggasiivoq.