Kujalleq nutaamik aqutsisoqalissasoq: Borgmesterinngortussaq oqaaseqartoq

Malene Vahl Rasmussen (D) Kommune Kujallermi taaguunneqarnerpaavoq.

Taanna Demokraatit arfineq-marlunnik qinigaatitaqareersullu borgmesterinngornissamut isumaqatigiinniartuusussanngorpoq. Siumut tallimanik qinigaatitaqarpoq, Inuit Ataqatigiillu (IA) pingasunik.

Borgmesteriugallartoq, Stine Egede (IA) 2021-mi qinersinermi 410-nit taaguunneqarsimasoq qinersinermi matumani qinersisuminik annaasaqangaatsiarluni 80-init taaguunneqarpoq. Kommunimi ajornartorsiuteqaaloqattaareernerata kingorna tamanna pivoq.

KNR-ip Malene Vahl Rasmussen qinersinermi ajugaanerata kingorna oqaloqatigaa.

Nutaamik aaqqissuussisoqassasoq

Stine Egedep Kommune Kujalleq aaqqissuussiffiginissaa sulissutiginiarlugu piffissap qaangiuttup ingerlanerani oqaatiginikuuaa. Malene Vahl Rasmussenilu assinganik maanna nalunaaruteqarpoq.

- Naqqaninngaanniik suna tamaat torersartussaavagut, pisortaanerit taavalu pisortaqarfiit allat aamma inuttalersorneqartussaapput nutaamik.

Kommune Kujalleq 70 millionit koruuninik amigartooruteqarsimasoq aningaasaqarnerlu aningaasaqarnermut ataatsimiititaliamit borgmesterimillu iluamik nakkutigineqarani piffissami kingullermi ingerlasimavoq, TV-p qanittumi saqqummiuppaa.

Taassumali anguniagassamini suna siulliussanersoq oqaatiginiangilaa.

- Taanna massakkut akisinnaanngikkallarpara, Malene Vahl Rasmussen oqarpoq.

Isumaqatiginninniarnissaq erseqqinngitsut

Isumaqatigiinniartoqartussanngorporlu. Demokraatimmi anguniagartik suunersoq erseqqissumik suli oqaatiginianngikkaluarlugu allannguingaatsiarnissartik neriorsuutigaat.

Allannguerusussuserput taavalu inissisimaffitsinninngaanniit nikeriarnissaq annertuumik taanna samminikuuarput qineqqusaarnitsinni, qanoq ingerlariaqqissaagut uku pisussat aggersut kommunitsinni eqqarsaatigalugit unammilligassallu suut eqqarsaatigalugit piareersarnikuuvugut akisussaaffik suna pulaffigilernerlugit, Malene Vahl Rasmussen oqarpoq.

Ulluni tulliuttuni kikkut kaffisoqatigissavigit?

- Partiit tamaasa isertut oqaluutissavagut. Piareersarnikuuvugut, suut uagut anguniarusunnerlugit, taavalu tulleriiaarinerit suut allattoreernikuuagut, taamaammat isumaqatiginninniarnissatsinnut piareersimaqaagut.

- Nuannaaqaanga, tupaqqalaarpunga. Kisianni tassa ilimasunnikuuvunga, ullut kingulliit inuit qisuariaatai malillugit ilimanarsikannereernikuugami, taamaammat tupappunga kisianni tuparujussuarnanga.