Krakowimi aallaasersortutut pasisaq toqusoq

Polenip illoqarfiisa ilaanni Krakowimi inuit arfinillit aallaasersortoqarnerani toqutaapput. Pasineqartoq napparsimmavimmi toquvoq.
Peqqarniisaarniartutut pasineqartup angerlarsimaffiata silataani politiit biilii. Assi © : Kacper Pempel/Reuters/Ritzau Scanpix
Allattoq Ritzau
novembarip 09-at 2026 07:52
Nutserisoq Brian Jensen

Polenip illoqarfiisa ilaanni Krakowimi angut, Polenimi illoqarfimmi Krakowimi aallaasersornermi toqutsisutut arfininngornermi pinerluttuusorineqartoq, napparsimmavimmi toquvoq.

Polenimi politiit, inuit attaveqatigiittarfianni X-imi, ataasinngornermi ullaakkut taama nalunaarput.

-Pisimasunik alianartunik pinerluuteqartup napparsimmavimmi toqusimanera nalunaarutigisinnaavarput, politiit allapput.

Aallaasersortoqarnerani inuit arfinillit toqutaapput.

Pinerluttuusorineqartoq politiinit arfininngornermi aallaaneqareerluni tigusarineqarpoq, 

Tamatuma kingorna perulummat napparsimmavimmut unitsinneqarpoq, 

Pinerluttuusorineqartoq 24-nik ukioqartoq, politiit siusinnerusukkut nalunaarutigaat

Peqqarniisaarniartoqarnersoq

Polenimi inuit amerlasuut aallaasersorfigineqarnerata kingorna unnerluussisussaatitaasut peqqarniisaarniarnermik misissuinermik sapaammi aallartitsipput.

Pisimasoq pivoq Rynek Głównymi, tassa Krakowip  pisoqartaata qeqqani niuffaffissuarmi. Sumiiffik takornarianit amerlasuunit tikinneqartarpoq. 

-Misissuinermi inuit arfinillit aallaaneqarnikkut toqutaanerannut, allanillu amerlasuunik, politiinit, toqutseriarnermut tunngasut  ilaatigut misissorneqassapput. Pinerliineq peqqarniisaarniarnermik siunertaqartoq, unnerluussisussaatitaasut nalunaarput.

Toqungasut sisamat Polenimi innuttaasuupput. Aamma tuluk ataaseq Østrigimilu innuttaasoq ataaseq toqutaasunut ilaapput.

Oqartussat paasissutissiinerat naapertorlugu pinerluttoq kisimiilluni iliuuseqartuuvoq.

Sakkutuut atisaattut atisaqarpoq, Polenimilu nunami namminermi ministeri Marcin Kierwińskip oqarnera naapertorlugu, “sakkortuumik talerperliuniat isummersortarnerannik soqutigisaqarluarsimavoq”.

Krakowimi toqutaasut saniatigut, pinerluttup angerlarsimaffiani aamma inuit pingasut toqungasut nassaarineqarput.

Polenimi politiit paasissutissiinerat naapertorlugu, inuit taakku tassaapput; angutip 24-nik ukiullip angajoqqaavi qatanngutaalu arnaq.

Misissuisut Polenimi tusagassiorfinnut oqaluttuarput pinerluttoq siusinnerusukkut pinerluuteqarsimasutut pineqaatissinneqarsimanngitsoq. Ataatanilu toqukkut qimagutereersoq peqatigalugu aallaasersortartut klubbianni ilaasortaavoq.

Aallaasersornerup kingorna Polenimi ulluni marlunni nuna tamakkerlugu aliasuffiusussatut nalunaarutigineqarpoq.