Kommuni sunngiffimmi ornittakkanut pilersaarusiortoq

Immikkoortortamut pilersaarut, sunngiffimmi ornittakkat inerisarniarneqarneranni iliuusissatut pilersaarusiornissamut, aqqutissiuissaaq.

Allattoq Markus Valentin

marsip 03-at 2026 13:41

Nutserisoq Medea Olsen

Kommuneqarfik Sermersooq immikkoortortamut nutaamik pilersaarusiorpoq.

Pilersaarusiaq meeqqat inuusuttullu qulingiluanit 21-t tungaannut ukiullit sunngiffimmi ornittagaasa patajaallisarneqarnissaannut aqqutissiuissaaq.

Tusagassiutinut nalunaarummi taama nalunaaruteqarput.

Kommuneqarfik Sermersuup siunissami suliassaminni pingaartitaat pilersaarummi taakkartorneqarput.

Taamaattumik immikkoortortamut pilersaarusiaq politikkitigut, soorlu aningaasaliinerup tungaatigut, maannakkut allannguinngilaq

IMMIKKOORTORTAMUT PILERSAARUSIAP IMAI

Immikkoortumut pilersaarummi pisariaqartitat uku ilaatigut erseqqissaatigineqarput:

Ornittakkami avatangiisit toqqissisimanartut ineriartorfiusullu qulakkeerneqassapput.
Meeqqat inuusuttullu atugarissaarnissamut ataatsimuussuseqarnissaannullu nakussassarneqassapput.
Sulisut suliatigut ineriartornissaminnut periarfissaqarluartitaanerulissapput.
Suliffimmi atugassarititaasut ullutsinnut naleqquttussaapput.
Piorsarsimassutsimik, kinaassutsimik sumullu attuumassuteqarnermik nakussassaaneq.
Qarasaasiatigut aaqqiissutinik angusassamik toraagaqarluni atuineq.

Allisiguk

Ukiut marluk qaangiuppata iliuusissatut pilersaarusiornissaq

Politikkerit immikkoortortaqarfimmut pilersaarut sunngiffimmi ornittakkanut iliuusissatut pilersaarusiornissaminnut atorniarpaat.

Politikerit immikkoortortaqarfimmut pilersaarut, sunngiffimmi ornittakkanut iliuusissatut pilersaarusiornissaminnut ukiuni marlunni tulliuttuni atorniarpaat.

Iliuuserisassani suut pingaarnerpaajutissanerlugit qanorlu iliortoqassanersoq tassani paasissavaat.

Kommuneqarfik Sermersuumi Meeqqanut, Ilaqutariinnut Ilinniartitaanermullu Ataatsimiititami siulittaasup Poul Petersenip (D) tamanna nuannaarutigaa.

– Immikkoortumut pilersaarutip akuersissutigineqarneratigut sulinissatsinnut ataatsimut pilersaarusiukkamik toqqammavissaqalerpugut. Suliniutissat aningaasaqarnerlu pillugit aalajangiiffigisassat iliuusissatut pilersaarutissani missingersuutillu pillugit isumaqatigiinniarnerni aalajangiunneqassapput.

Taassumap sunngiffimmi ornittakkat inuusuttorpassuit ulluinnarni inuunerannut pingaarutilittut inissisimanerat tusagassiuutinut nalunaarummi oqaatigaa.

– Taakkunani namminiusinnaapput, ikinngutiminnik naapitsisarput, sammisassanik nutaanik misileraasarput inersimasunillu tapersersorneqartarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.