KNR TV tallimanngornermi decembarip arfernani nal. 19.30 TV-kkut aliikkusersuinermik alutornarluinnartumik aallakaatitsissaaq, Nunatsinnilu atisanik ilusilersuisartut piginnaaneqarnerpaat sisamat atisaliaminnik nutaanerpaanik saqqummiussissapput kalaallillu atisaliortartut immikkuullarissumik kulturikkullu pingaarutilimmik ilusilersuisarnermikkut nunani tamalaani atugaasunut naapertuuttumik suli ingerlarsortuarsinnarnertik takutissallugu.

Kalaallit atisaliortarnerannik kinaassusiannillu malunnartitsineq

Pisortat nutaat TV-milu pisortap Mathias Davidsenip anguniagaasa ilaatut KNR TV-p siunertaraa kalaallit atisanik ilusilersuisartut saqquminerulersinnissaat, taakkumi annertuumik unammilligassaqaraluarlutik atisanik kulturikkut kinaassutsitsigullu ilisarnaatitsinnik pingaarutilinnik pilersitsisinnaasimapput.

- Nunatsinni ilusilersuisartortavut nersorusuppagut saqqumilaartinnissaallu naleqquppoq. Kalaallit Nunatsinni atisaliortarnikkut kulturi nukittuumik inissisimavoq, aamma kalaallit atisanik ilusilersuisartut saqquminerulernissaannut piffissanngorpoq, tassaaginnanngillammi ilisarnaatit pisiniarfinni takuneqarsinnaasut, kulturikkulli pingaarutilimmik oqariartuuteqarlutik pinngorartitsisuupput, KNR TV-mi TV-mut pisortaq Mathias Davidsen oqarpoq.

TV-kkut toqqaannartumik aliikkusersuineq

Atisanik takutitsineq KNR TV-kkut TOQQAANNARTUMIK aallakaatinneqassaaq nunatsinnilu aamma nunani tamalaani isiginnaartartunit KNR-ip nittartagaatigut isiginnaarneqarsinnaassalluni. Catwalkimi takutitsinerit alutornarluinnartut saniatigut aamma nipilersortoqassaaq atisallu pillugit immikkut ilisimasallit aallakaatitsivimmiissapput atisat saqqummiunneqartut ataasiakkaat atisallu atugaanerusut oqaaseqarfigisassallugit.

- Aallakaatitassiamik kinguaariinnik tamanik – inuusuttunit utoqqarnut - peqataatitsisumik pilersitsisinnaassalluta neriuutigaarput, atisammi mutit atisanillu atueriaaseqarnerput tamatsinnut attuumassuteqarput. Manna aallarniutaannaavoq, aamma KNR TV-kkut kulturimut tunngasunik aallakaatitassianik pissanganartunik amerlanerusunik aallakaatitsisarnissatsinnut qilanaarpugut, Mathias Davidsen aamma oqarpoq.

Atisanik takutitsinermi saqqummiisussat tassaapput Nûno Pedersen aamma Laila Friis Salling, taakkulu aliikkusersuisoqarnerani isiginnaartunut nassuiaassisarumaarput.

- Atisanik takutitsineq nuannarineqarluassappat aappaagu aamma taamatut aallakaatitseqqissalluta pilersaarutigaarput, Nunatsinni ilusilersuisartunngorumaartut suli amerlanerusut saqqummernissaannut periarfissikkumallugit, Mathias Davidsen naggasiivoq.