KNI nioqqutissaqarnermut ingerlatsivimmi pisortartaartoq
Nanna Lynge Isaksen ukiut sisamat KNI-mi Nioqqutissanik pisiortornermi pisortareerluni, 1. september aallarnerfigalugu Kalaallit Nunaanni pilersuinikkut suliffeqarfiit annerpaanni nioqqutissaqarnermi ingerlatsivimmi pisortanngussaaq.
Tamanna KNI-p tusagassiuutitigut nalunaarutimini allappaa.
Nioqqutissaqarnermi ingerlatsivimmi pisortatut, KNI-p nioqqutissatigut immikkoortortaa tamakkiisumik akisussaaffigilissavaa, pilersaarusiornermi siunnerfik aalajangissallugu kiisalu pisiortornermi, assartuinermi pisiniarfiillu akornanni suleqatigiinneq patajaallisassallugu.
KNI naapertorlugu Nanna Lynge Isaksenip
ingerlatsinerup pitsanngorsarnissaa unammillernissamullu piareersimasumik aaqqissuussinissaq piffissami matumani, suliffeqarfissuup ingerlatsinermik pitsanngorsaanissamik piumasaqarfineqarnerani pilersuinikkullu qulakkeerinninnissap tungaatigut unamminartoqarfimmiinnerani suliassaata pingaarnersaasa ilagissavaat.
Jeppe Jensenillu, KNI-mi pisortaanerup suleqatigiilernissaq qilanaaraa.
- Nanna aqutsisuuvoq anguniakkaminut aalajangersimasoq, ineriartortitsinermut aallussilluartoq, qanilaartorlu. Akisussaaffimmik tigusilluni anguniakkat suliamini ersersittarpai, periusissiamilu anguniakkat iliuuseqarnermigut piviusunngortittarlugit. Nannap suleqatigeqqinnissaa qilanaaraarput, atorfittaavanullu tikilluaqqullugu.
Nanna Lynge Isaksen ukiut aqqaneq marluk sinnerlugit nunatsinni niuernermik misilittagaqarpoq kiisalu 2021-mili KNI-mi Nioqqutissanik pisiortornermi pisortatut atorfeqarluni. Sisimiuni inunngorpoq peroriartorlunilu, Copenhagen Business Academymi markedsføringsøkonomitut ilinniarsimasuuvoq saniatigullu KNI-mi aqutsisutut ilinniagaqarnikuulluni.
