KNAPK Aalisarneq pillugu Siunnersuisoqatigiinni siulittaasunngoqqittoq
Sulisitsisut Aalisarneq pillugu Siunnersuisoqatigiinni siulittaasuuffik KNAPK-mut tunniuppaa.
Tamanna siunnersuisooqatigiit sapaatip-akunnerani kingullermi ataatsimiinneranni pisoq, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup tusagassiuutinut nalunaarutigaa.
Siulittaasunngortitsineq siunnersuisoqatigiit marsip 19-ianni ataatsimiinneranni pivoq.
Tassa Niels Boassenip, KNAPK-mi pisortaanerugallartup, siulittaasuuffik Bent Sørensenimit, Sulisitsisuneersumit, tiguaa.
Aalisarnermut Siunnersuisoqatigiit Sulisitsisunit, KNAPK-mit aamma Qalerualinniat Aalisagarniallu Kattuffiannit(QAK) ilaasortaaffigineqarput, kattuffiillu taakkua pingasut siulittaasuuffimmik kingoraartaapput.
Taamaattumik Sulisitsisut siulittaasuuffik KNAPK-mut ingerlateqqimmassuk eqqumigisassaanngilaq.
