Natop qullersaata, Mark Ruttep, USA-llu præsidentiata, Donald Trumpip, Ruslandip Kinallu Kalaallit Nunaata aningaasaqarneranut sakkutooqarnikkullu periarfissaqalinnginnissaat qanoq qulakkeerneqarsinnaanersoq eqqartorpaat.

Nutaarsiassaqartitsiviup Reutersip nutaarsiassiinera naapertorlugu, Natop pisortaanera Davosimi nunarsuarmi aningaasarsiornermut tunngasunik oqalliffiusumi sisamanngornermi ullaakkut taama oqarpoq.

Issittup isumannaatsuunissaanik Nato qanoq qulakkeerinnissinnaanersoq Trumpimik pingasunngornermi ataatsimeeqateqarnermini eqqartorsimallugu, Ruttep nangilluni oqaatigaa.

- Tamanna oqaloqatigiissutigilluaqaarput, Rutte Reuters naapertorlugu oqarpoq.

Trump inuit attaveqaqatigiittarfianni, Truth Social-imi, pingasunngornermi ataatsimeeqatigiinnerup kingorna allappoq, Kalaallit Nunaat pillugu siunissami isumaqatigiissuteqarnissamut sinaakkutissat suliarineqarsimasut.

Sinaakkusiinermulli tunngatillugu paasissutissat sukumiinerusut uppernarsarneqareersut amerlanngillat.

Nammineq oqartussaatitaaneq isumaqatiginninniutaanngitsoq 

Danmarkimi ministeriuneq Mette Frederiksen (S) sisamanngornermi ullaakkut oqarpoq, Danmarkip oqartussaanera isumaqatiginninniutigineqarsinnaanngitsoq.

- Politikkikkut suut tamaasa isumaqatigiinniutigisinnaavagut - isumannaallisaaneq, aningaasaliinerit aningaasaqarnerlu - namminerli oqartussaassuserput isumaqatigiinniutigisinnaanngilarput, ministeriuneq allakkatigut nalunaarummi oqarpoq.

Kinap nunanut allanut ministereqarfia Nato-p nalunaarutaanut Reutersip nutaarsiassiinera naapertorlugu sisamanngornermi qisuariaateqassaaq. Ministeriaqarfimmiit oqaatigineqarpoq, "Kinamit aarlerinartorsiortitsisoqarneraaneq" ilumuunngitsoq.

- Tunngavissaqanngitsumik pititsineq Kinalu patsisiullugu namminissarsiorluni iluanaaruteqarniarneq Kinamit akerlerineqarpoq, Guo Jiakun, Kinami nunanut allanut ministereqarfimmi oqaaseqartartoq oqarpoq.

Ruslandip Kinallu Kalaallit Nunaanni eqqaaniinnerallu amerikamiunit siornatigut ernumagineqartarsimapput.

Nunat taakku Kalaallit Nunaata imartaani annertuumik takussaasut Trumpip ilumoornerarpaa. Tamannali Danmarkimit immikkut ilisimasalinnillu ilumuunnginnerarneqarpoq.

Kinamiut suliffeqarfiutaata Kalaallit Nunaanni mittarfiliornissamik soqutiginninnera ukiut arlallit matuma siorna oqallisaangaatsiarpoq.

Akitsuusersuiniarnerit taamaatiinnarneqartut 

Sinaakkutissanik isumaqatigiissuteqarnissaq pillugu pingasunngornermi nalunaarummut atatillugu, Amerikamiut præsidentiata Danmarkimut Europamilu nunanut Kalaallit Nunaata tiguarneqarnissaanut akerliusunut akitsuusersuinissaminik sioorasaarinini taamaatippaa.

Davosimi ataatsimeersuarneq ataasinngornermi aallartippoq tallimanngornermilu naammassissalluni. Inuit 3000-ingajaat nunanit 130-nit amerlanerusuneersut peqataapput.

Nunarsuarmi pissaanillit sunniuteqartullu aningaasaqarnikkut ineriartorneq, piitsuussuseq, naligiinneq, sorsunnerit silallu pissusiata allanngoriartornera oqallisiginiarlugit ataatsimeersuariartarfigaat.

/ritzau/