Killilersuinerit nutaat Air Greenlandimut ilungersunartorsiortitsisut
Nuup mittarfiata qanittuani silaannarmut atatillugu killilersuineq, Air Greenlandip angalanissamut pilersaarutaannut ajornartorsiortitsingaatsialersoq.
Tamanna Trafikstyrelsenip timmisartumik angallannerup isumannaannerulernissaa siunertaralugu, inatsip nutaap septembarip 22-ani atuutilersinnerata kingorna pivoq.
Air Greenland tusagassiutinut nalunaarummi allappoq, isumannaallisaaneq timmisartuutileqatigiinni pingaarnerpaatikkaat, kisianni aamma allannguutit annertuumik kinguneqassasut. Sullitanut Kalaallit Nunaannilu attaveqaasersuutitigut.
Air Greenlandip angallavii piorsarneqarsimapput Nuummi aallaaveqarlutik, timmisartut amerlanersaat siumut utimullu utertarlutik. Taamaaliornikkut ullormi ataatsimi illoqarfiit nunaqarfiillu kiisalu nunat tamat akornanni attaveqarsinnaalluni.
- Nunami Nunatsitut ittumi ornigassarpassuaqartumi ikittunillu angalasoqarfiusuni taamatut aaqqissuussineq attaveqaasersuutitigut imminut atanermut pingaarluinnartuuvoq, Air Greenland tusagassiutinut nalunaarummi allappoq.
Aaqqissuussineq killilersuinerit taakku eqqunneqarnissaasa tungaanut taamaaliortoqarsinnaajunnaartoq, erseqqissaatigaat.
Timmisartuussinernik nutaamik amerlanerpaaffiliineq
Killersuinerit nutaat kingunerissavaat, Nuup mittarfiani akunnerup ataatsip ingerlanerani amerlanerpaamik sisamanik timmisartuussisoqarsinnaanngussasoq, amerlanerpaamik tikinnerit marluk aallarnerillu sisamat. Tamatuma saniatigut tikinnerit marluk akornisigut minnerpaamik minutsit 20-iussalllutik.
Allannguinerit sioqqullugit Air Greenlandimi akunnermut timminerit arfineq pingasut tungaannut ingerlanneqartarput, timmisartorsuup Danmarkimut Danmarkimiillu angalaneranut atatillugu. Maanna amerlassusaat affaannanngortinneqarput, suliffeqarfillu naapertorlugu, tamatuma kingunerissavaa sinerissap Nuullu timmisartorsuup tikiffigisartagaata akornanni ullormi ataatsimi aqqutit pilersaarutit 40 procentii missaaniittut ingerlanneqarsinnaajunnaassammata.
Ujaasinernut annaassiniarnernullu kiisalu ambulancetut timminernut maleruagassat atuutinngillat.
Angalasussanut unnuinerit amerlanerusut
Killilersuinerit kingunerissavaat siunissami angalasorpassuit unnuisariaqartarnissaat, Nuummi imaluunniit angalanerminni aqqusaakkaminni allami ilimagisariaqartassavaat.
- Oqaatigisinnaalereerparput tamanna kiffartuussinermi ajorseriaataassasoq ingammik nunatta iluani aqqutini. Sullitallu ilimagisariaqartassallugu unnuisariaqarnissartik apeqqutaalluni angalanerat sumi aallartillunilu naammassinersoq, Air Greenlandimi ingerlatsinermut pisortaq tusagassiutinut nalunaarummi oqarpoq.
Aallarnissaq sioqqullugu ullut 14 iluanni allanngortoqarpat unnuinermut aningaasartutit Air Greenlandimit akilerneqassasut erseqqissaatigaa.
Kinguaattoortoqarneroratarsinnaasoq
Air Greenland naapertorlugu, sila ajortillugu teknikkikkulluunniit ajutoortoqartillugu taamaatitsiinnarnermi ajornartorsiutit annertunerulersinnaapput. Suliffeqarfik timmisartuussinernik allanik siornatigut ilasikulanersarnikuugaluarpoq, inatsisilli nutaat atuutilermata tamanna killilersimaarneqalerpoq.
- Tamanna peqqutigalugu aallanngitsoortut ajoraluartumik sulisivisunerusumik kinguaattuussapput. Air Greenlandili aamma aallanngitsoornermut aningaasartuuteqarnerulissaaq, Line Frederiksen oqarpoq.
Air Greenland Greenland Airportsilu tamatuma kingunipiluinik annikillisaataasinnaasunik aaqqiissutissanik qanimut suleqatigiipput.
- Neriuppugut Air Greenland peqatigalugu timmisartornikkut isumannaallisaanermi allanik iluarsiissutinik pilersitsisinnaalluta, angalasunut kingunipilui sapaatit-akunnerit sisamat tallimat tulliuttut annikillisarlugit, Jens Lauridsen, CEO Greenland Airports, taama oqarpoq
