Ilisarititsineq: Karoline Nielsenip nunatsinni qaannamik sukkaniunnissaq takorluugaraa

Karoline Nielsenip qajaq suminngaanneernersoq anaanaminut 2016-imi ukiuusoq apeqqutigaa.

Kalaallit Nunaannit akissutigineqarpoq.

- Kalaallinit sooq qaannamik unammisartoqannginnera paasisinnaanngilara. Taava eqqarsalerpunga taamaaliorniarlunga, Karoline Nielsen affarmik kalaaliusoq oqarpoq.

KNR-ip 22-nik ukiulik, Karoline Nielsen internettikkut attaveqarfigaa. Taanna Silkeborgimi ilaquttami illuata sialataaniilluni kingumut eqqarsarpoq.

Anaanaminut apeqquteqarnermi kingorna aasaasoq sumiiffigisaminni qajartortartut klubbianni qajaq siullerpaamik ikiffigaa.

- Nuannareqaara. Imaaniilluni timersorlunilu. Tamannalu nuannersorujussuusoraara, taanna oqarpoq.

Maanna ukiut arfineq-pingasut qaangiupput.

Karoline Nielsenip imaaniilluni qajartorneq misileqqaaramiuk misigissuseq nuannarilluinnarpaa. Kingornalu qimaqqissimanagu. Assi © : Privatfoto

Qaannamik sukkaniunnermi kingullermik Portugalimi nunarsuarmi pissartanngorniuttoqarmat 6-inngorpoq. Taassumalu kalaallit erfalasuat atorlugu unamminissani takorloorpaa, taamaalillunimi nuna kingoqqiffini takutissinnaassallugu. 

Immaqalu nunarput arlalinnik timersuuteqartutut namminersortutut takutinneqarsinnaaneranut aqqutissiuutaasinnaavoq.

Saattuni piniarneq qajartornerlu

Karoline Nielsen Nuummi inunngorlunilu peroriartorpoq. Taassuma anaanaa Uummannap avannaata kangianit – Saattuneersuuvoq. Karolinep arnaa Nuummut ilinniartoriarluni nuukkami Karolinep ataataa danskiusoq naapippaa.

Karoline Nuummi Dronning Ingridip Napparsimmaviani 2003-mi inunngorpoq. Taanna sisamanik ukioqartoq ilaqutariit Danmarkimut nuupput. Taassumami angutaata arnaatalu Karolinep aqqaluaatalu aanaakkuminnut attaveqarluarnerulernissaat kissaatigaat.

- Anaanannik aataga aanagalu siusingaatsiartukkut qimagupput, ataatallu angajoqqaavi Danmarkimi najugaqarlutik, taanna oqarpoq.

Karoline Nielsenip anaanaminik aanaava (saamerleq) Saattuneersuuvoq. Aamma aanaminik aataava, anaanaminiillu ilaqutaasa sinneri. Karoline Nielsen (talerperleq) pissutissaqaraangami tulluusimaarluni kalaallisoortarpoq. Assi © : Privatfoto

Karoline Nielsenip aanani aatanilu iluamik ilisarisimanngilai. Kisianni aatani aataqqiinilu Saattuni qaannamik piniartarsimaneri pillugit oqaluttuutsittarluni peroriartorpoq.

Taassumalu arnaq aanami ilaqutaaneersoq Saattunit ullut ilaanni umiamik aallarsimasoq aataqqiimilu qaannaminik aariarlugu Saattunut angerlaateqqittariaqarsimagaa pillugu oqaluttuaq immikkut eqqaamalluarpaa.

- Taanna eqqarsaatigalugu pikkunarpaluppoq – inuunermullu pisariaqarluinnarluni, taanna oqarpoq, qungujullunilu.

Nunatsinni qaannamik piniariartortartut angallatitullu atuisut ullumikkut amerlanngillat. Sunngiffimmi sammisaqarnermut pingaartumik atorneqarpoq – nunarsuarmilu unammissutaasartunngorsimalluni.

Karoline Nielsen meeraalluni pinnguartoq. Taassuma nunarput kingullermik 2019-imi tikeraarpaa. Assi © : Privatfoto

Qaannalli suminngaanneernera Karoline Nielsenimut pingaaruteqangaatsiariarpoq.

- Aataga aataqqiigalu pillugit oqaluttuat uanniittorujussuupput, taanna oqarpoq, nangillunilu:

- Oqaluttuat taakku qajartortarnissannut pingaartumik isumassarsiffigigunarpakka.

Pinngoqqaarfini tulluusimaarutigigai

Karoline ilaquttanilu Silkeborgimi ullumikkut najugaqarput. Imaanut ulluinnarnilu akunnerpassuarnik atuiffigisartakkaminut qanittumiilluni. Taanna kingullermik 2019-imi nunatsinniippoq.

- Tikeqqikkusoqaara, kisianni akisoorujussuuvoq. Kisianni maqaasilluinnarpara, taanna oqarpoq.

Taassuma qajartortalernera siuaaminut qaninnerunissaanut tunngassuteqarpoq.

- Kalaallit nunaannut atassuteqarnerulersippaanga, taanna oqarpoq.

Timersuutini Kalaallit Nunaat sinnerlugu unammisinnaatitaanissamut suliniarneq ajornakusuungaatsiarpoq, pingaartumik qaannamut tunngatillugu, Karoline Nielsen oqarpoq. Assi © : Flemming W. Jensen

Karolinep unamminerminit angusaminiillu assit facebookikkut siammarterajuppai. Tassanilu nunatsinneersunit maluginiarneqangaatsiartarpoq.

- Assut qujamasunnarpoq. ‘Qaffasissumiittutut’ misigisimavunga. Inuppassuit aamma ilisarisimanngisakka malinnaapput, unammineralu kajumilersitsilluarsoraat, taanna oqarpoq, nangillunilu:

- Kalaallit Nunaannit tapersorneqarnera danskit tapersersuisoqartarneranut sanillersuunneqarsinnaanngilaq.

Karoline imminut kalaallisut taagortuaannarsimavoq. Apersortikkami kalaallisuunik atorpoq, pissutissaqaraangamilu kalaallit pinnersaataannik atugaqartarluni.

Karoline Nielsenip angajoqqaavisa Karoline sisamanik ukioqartoq Danmarkimut nuunnissartik aalajangerpaat. Talerperlermi Karoline Nielsenip arnaatalu assingat takuneqarsinnaavoq. Assi © : Privatfoto

- Inuiaassutsit takutinnissaa pingaaruteqarpoq, danskimmi ilisimasaqarpallaanngillat. Inuillu apeqquteqaraangata nuannertarpoq, aperisoqarpallaarneq ajorami, taanna oqarpoq.

Ukioq manna – Danmark nunarpullu tusagassiuutitigut nammineq angaatsiarneranni – suminngaanneernera Kalaallit Nunaallu pillugit aperineqarnerulluni misigisimavoq.

- Apeqqutigineqartut amerlanerupput. Inuit paasisaqarneruniarnerat ukkatarineqarneruneralu nuannerpoq  - taamaattoqanngisaannarpormi, taanna uparuaavoq.

Erfalasorput atorlugu unammineq

Karoline Nielsen Aarhus Universitetimi uumassusillit sananeqaataat teknologimillu atortut pillugit ilinniarfimmi ilinnialeqqammerpoq. Tamannalu sungiusartarneranut allannguilaarpoq. Taamaakkaluartorli ullormut arlaleriarluni sungiusartarpoq.

Maanna ukiup tullianut – Europami nunarsuarmilu pissartanngorniunnissanut sungiusarpoq. Aamma World Cupimut, taassumalu kalaallit erfalasuat atorsinnaassallugu neriuutigaa.

- Iluatsinniarnera ajornakusuulaarpoq. Periarfissat suuneri misissuleruttorpagut, taamaammat nunatut akuerineqarnissarput neriuutigaarput.

Taassuma piffissami ungasinnerulaartumi periarfissaqalissaguni OL-imut anngussinnaajumaarluni takorluugaraa. Aamma naak unammineq sakkortugaluartoq.

- Kisianni kalaallit erfalasuat atorlugu unammisinnaanissara anguniakkama ilagaat. Tamanna uannut isumaqarluinnartussaavoq, taanna oqarpoq, nangillunilu:

- Naallu qaannamik sukkaniuttaraluarlunga qaannap Kalaallit Nunaannit suaaqarfinneersuunerata takutinniarnera nuannerluinnarpoq.