Kangia Qiterlermi akerleriittoqarnera pissutigalugu Trumpip G7-it ataatsimeersuarnerat qimakkaa
Canadami nunat G7-imut ilaasortat pisortaasa ataatsimiinnerat USA-p præsidentiata Donald Trumpip pilersaarut sioqqullugu qimappaa.
Taamak Præsidentip Illorsuanit qallunaat nalunaaqutaat malillugu marlunngornermut unnuaani paasissutissiivoq.
Sumiiffimmi piffissaq malillugu ataasinngornermi unnukkut nereqatigiinnermut peqataavoq, tamatumalu kingorna Washington D.C.-mut timmisartorluni uterluni, taamak Præsidentip Illorsuani oqaaseqartartoq Karoline Leavitt X-imut allappoq.
- Præsident Trumpi G7-mi ullugissaarpoq, taamalu Tuluit Nunaat ministeriunerlu Keir Starmer peqatigalugit niuernermut isumaqatigiissut annertooq atsiorpaat.
- Angusaqangaatsiaqaagut, Kangia Qiterlermili pissutsit pissutigalugit, naalagaaffiit siuttuisa unnukkut nereqatigiinnerisa kingorna Trumpip ataatsimiinneq qimakkaa, Leavitt allappoq.
G7-mi ilaasortat ataatsimiinneranni Trumpi marlunngorneq ilanngullugu peqataanissaa pilersaarutaagaluartoq, amerikamiut tusagassiorfiat CNN allappoq.
Sillimaniarnermut siunnersuisoqatigiinni ataatsimiinneq
Trumpi sillimaniarnermut siunnersuisoqatigiinni ataatsimiittoqarnissaanik qaaqqusisimasoq, Præsidentip Illorsuani qaffasissumik atorfillit amerikami tuagassiorfinnut arlalinut paasissutissiipput.
Donald Trumpilumi nammineq oqarpoq, ataatsimiinnerup qimanissaa pisariaqartoq.
- Sapinngisamik sukkanerpaamik utertariaqarama, G7-mi ataatsimiinnermi tusagassiortunut oqarpoq.
Canadami Kananaskisimi ataatsimiinnermi USA-p nunanut allanut ministeria Marco Rubio aamma peqataavoq.
Taamma aamma til Washington D.C.-mut uteqataasoq, CBS News allappoq.
Aamma illersornissamut ministeri Pete Hegseth suna tamaat qimaannarsimagaa, Nutaarsiassaqartitsivik AP allappoq.
Taanna Præsidentip Illorsuani "situation room"-imik taagugaannut sillimaniarnermut siunnersuisoqatigiit ataatsimiinnerannut peqataajartorpoq.
Iran Israelillu akornanni isumaqatigiinnginneq annertusisoq
Israel Iranilu ulluni kingullerni sualuttumik imminnut silaannakkut sassusseqattaapput. Israelip Iranimut arlalinnik periagaqarluni atominik tallimanngornermut unnuaani saassussinerata kingorna, nunat taakkua marluk akunnerminni isumaqatigiinnginnerat annertusivoq.
G7-imi nunat ilaasortaasut tassaapput USA Canadamit, Frankrig, Japan, Italia, Tuluit Nunaat, Tysklandilu EU-li aamma ataatsimiinnernut peqataasarpoq.
Canadami ataatsimeersuarnermi, Ukrainemi sorsunneq aamma Iranip Israelillu akornanni akerleriinneq pillugit oqallisigineqartussaapput.
Europamiut siuttuisa arlallit neriuutigisaraluattut arlalitsigut ataatsimiinneq ingrlanneqarsimanngilaq.
Siornatigut G8-mik taagorneqartoq, Ruslandi Vladimir Putin præsidenteritillugu ilaasortanut ilaajunnaarnera pillugu Trumpip periarfissaq isornartorsiuinissaminut atorpaa.
Tamatumunnga ilanngullugu, nunat taakku Israelip Iranillu akorniminni akerleriissutiminnik annikillisaanissaannut kajumissaaralutik ataatsimut oqaaseqaatissatut siunnersuutaannut, Trumpi atsiornissaminut akuersisimanngitsoq, tusagassiorfiit arlallit allapput.
Trumpip ataatsimiinneq piffissaq sioqqullugu ingerlasimanera ajunngitsuusoq, Frankrigip præsidentia Emmanuel Macron Reuters naapertorlugu oqarpoq.
Macron naapertorlugu, USA Israelip Iranillu sakkuaakkunnaarnissaannik siunnersuuteqarpoq.
- Pingaartumik sakkuakkunnaarnissaq pillugu oqallisigineqarnerunissaanullu aallarniinissamut siunnersuummik tunniussisoqarnikuuvoq, taanna oqarpoq.
Trumpilli Iranip Israelillu sakkuaakkunnaarnissaat pillugu sulisariaqarluni, G7-mi ataatsimiinnerup qimattariaqarnera akerlilerpaa.
- Kukkuvoq! Sooq maanna Washingtoniliarnera sianigisaqarfiginngilluinnarpaa, kisianni tamanna sakkuaakkunnaarnissamut tunnganngilluinnarpoq. Tassannga annertunerujussuuvoq. Sianiginerpaa sianiginnginnerpaaluunniit, Emmanuelip paatsoorsimavaa, Trumpi Truth Socialimi allappoq.
