Kalaallit Nunaat Orkneyip qeqertaaraanni kuultinnakkusuppoq
Kalaallit timersortartut 30-t missanniittut Skotlandimi Orkneyip qeqertaaraanni, ukioq manna Island Games 2025-mi medaaliannanniukkiartorlutik katersuupput.
Island Games nunarsuaq tamakkerlugu unammiuaarfiusarpoq, ukiut marlukkaarlugit pisarpoq, nunarsuarlu tamakkerlugu qeqertarmiunit katersuuffiusarluni.
Ukioq manna qeqertat 24-t timersortartullu 1600-nit ikinnerunngitsut timersorluni unammeriaatsini arlalippassuarni – pisissaartatut arpattartut sulorartartut naluttartullu peqataapput. Peqataasullu assigiinngitsorpasuarneersuupput - Finlandip ilaani qeqertat Ålandimiit Atlantikup qeqertaannut Bermudamut.
Timersorluni unammeriaatsini arlalinni umannimissamut piareersimasut
Kalaallit timersortartut sulorarnermi, arpannermi, nalunnermi golfimilu peqataassapput.
Aamma aallartitat aqutsisuata allattuunerullu Jonas Jensenip unammiuaarnissat qilanaarai:
- Timersortartortatta takutitsilluarnissaat sapinngisartillu tamaat unamminissaat soorunami naatsorsuutigaarput.
Unammiuaarnerit sapaatip-akunnera sinnilaarlugu ingerlanneqassapput, ukioq mannalu juulip 12-ianiit 18-iata tungaanut pissallutik, kalaallillu peqataasut ullumikkut unammiuaarnerit pissanganartut arlallit peqataaffigileriissavaat.
Golfertartut golfertarfimmiissapput, naluttartut naluttarfimmiissapput – arpattartullu 10.000 meterimut arpallutik unammissapput.
Ullormut pisussani sulorarnermik ajugaaniutivinneqassasoq
Sulorartartut, semifinalemi Isle of Man ullumi ajugaaffigereerlugu, nunatta nalunaaqutaa malillugu 16:30 ajugaaniutivinnissaat ullormi pissanganarnerpaasutut naatsorsuutigineqarpoq.
Kalaallit Nunaat Island Games aallarteqqaarneraniit peqataasarpoq, ukiorpaalunngortunilu amerlasuunik medaaliannaffiusarpoq.
Sulorartartullu kuultinanniunnernut anngussinnaasarlutik arlaleriarlutik takutittareerpaat – angutit ataasiakkaarneranni aamma arnat ataasiakkaarneranni kingullermik 2023-mi kuultinnapput.
Ullumi taamatut torrallaaqqittoqassanersoq takussavarput.
Ajugaaniutivinneq unammiuaarnerillu allat toqqaannartumik Island Gamesip nittartagaani uani isiginnaaneqarsinnaapput.
