Kalaallit Nunaanni suliffissaaleqisut amerliartorput

Nunatsinni suliffissarsiorlutik nalunaartartut amerliartorusaartut, naatsorsueqqissaartarfiup kisitsisini saqqummiussaani kingullerni takuneqarsinnaavoq.
Allattoq Jaaku Lyberth
novembarip 15-at 2013 08:44

Suliffissarsiortutut nalunaarsimasut oktobarimi 3.413-iupput qaammatip siulianut sanilliullugit 179-nik amerleriarlutik.

Illoqarfinni suliffissarsiortutut nalunaarsimasut 2.795-iupput siorna piffissami tassani 2.616-iullutik. Nunaqarfinni suliffissarsiorlutik nalunaarsimasut 618-iupput.

Nuummi suliffissaaleqisut amerleriarnersaapput.

Nuummi suliffissarsiorlutik oktobarimi nalunaarsimasut 807-iupput siorna oktobarimut sanilliullugit 170-inik amerlanerullutik.

Aasianni suliffissarsiorlutik nalunaarsimasut aamma amerliartorput. 

Aasianni oktobarimi suliffissarsiorlutik nalunaarsimasut 182-iupput siorna taamaaliineranut sanilliullugit 60-inik amerlanerullutik.

Suliffissarsiorlutik nalunaarsimasut illoqarfinni Ilulissani, Uummannami, Qaanaami, Paamiuni, Qaqortumi Nanortalimmilu aamma amerleriarsimapput.

Maniitsumi, Sisimiuni, Kangaatsiami, Qasiannguani Upernavimmilu suliffissarsiorlutik nalunaarsimasut ikilerialaarsimapput.

Nunarput tamakkerlugu suliffissasiorlutik nalunaarsimasut 3.413-iusut akornanni angutit amerlanerupput 1.882-iugamik arnat 1.531-t suliffissarsiortutut nalunaarsimasut, naatsorsueqqissaartarfik nalunaarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk