Kalaallit filmeeraliaat Mexicomi pingasunik nersornaaserneqartoq
Kalaallit filmeeraliaat Entropy nunani tamalaani maluginiarneqaqqippoq.
Filmi Mexicomi filmfestivalimi Tulum We-mi sapaatip-akunnerata naanerani pingasunik nersornaatisivoq: Silap pissusiata allanngoriartornera pillugu filmeeraliani nuannernerpaatut toqqagaavoq, Inuk Jørgensen ilitsersuillaqqinnerpaatut nerornaasigaavoq, kiisalu Frederik Elsnerip Nanook-imeersup erinniaanik nipilersuutitaqarnermigut, filmeeraliani nipilersuutiginnerpaatut toqqagaalluni.
Filmi naatsoq CPH:DOX-imi 2024-mi takuteqqaarneqarsimavoq, taamaniilli nunarsuaq tamakkerlugu festivalini 50-init amerlanerusuni takutinneqarluni.
Silaannaq inuillu pingaartillugit nalliuttorsiorneq
Tulum We tassaavoq filmit pillugit nalliuttorsiorfik, avatangiisit, silap pissusia piujuartitsinerlu pillugit nunarsuaq tamakkerlugu filminik takutitsiffiusoq. Festivalimit nersonaasiinerit sapaatip akunnerata naanerani tunniussuunneqarput, Entropylu nersortisisut akornanniippoq.
– Filmeeraliatut sivisussusillit festivalini aaqqissuussanilu takutinneqarnissaminnut piukkunnarluinnartuupput, Entropylli taama soqutigineqartiginissaa takorloorsimanngilara, ilitsersuisoq Inuk Jørgensen tusagassiuutinut nalunaarummi oqarpoq.
– Frederik Elsnerip nipilersuusiinera nuannerluinnartoq nersornaasiinermut aamma peqqutaaqataasoq qularnanngilluinnarpoq, nipilersuusiineralu aamma nersornaatisissutaavoq. Pissutissaqarluarluni Kalaallit Nunaanni nipilersortartut pikkorinnerpaat ilagaat, suleqatigisinnaaneralu uannut periarfissatsialaavoq. Kalaallit filmiliaannik oqaluttuaannillu nunani tamalaani isiginnaarianut siammartereqataanissannut peqataasinnaagama nuannaarutigiinnarpara, taanna nangippoq.
Silap pissusiata allanngoriartornera kalaallit isaannit isigalugu, Entropymi sammineqarpoq. Nunatta sermersuaa ukiut tuusindillit ingerlaneranni pinngoriartorsimasoq, silaannaap kissatsikkiartorneranit aarlerinartumiippoq. Taamatullu aamma inuit pinngortitamut attaveqarnerat.
Pinngortitaq tammariartorujoortoq, kalaallit oqaluttuatoqai isumassarsiorfigalugit filmimi oqaluttuarineqarpoq, aammattaaq oqaluttuat ileqqutoqqallu taanna ilutigalugu piujunnaariartortut.
Ilitsersuisoq Inuk Jørgensen Sverigemi najugaqarpoq, Kalaallit Nunaalli pillugu suliaqarneruvoq. Qaqortumi inunngorpoq peroriartorlunilu.
Nunat tamalaat akornanni nersornaasiineq
Entropy nunat tamalaat akornanni nersornaaserneqarnerani siullerpaanngilaq.
Siorna saqqummersinneqaqqaarneraniit arlalippassuariarluni nersornaaserneqarpoq.
Tamanna ilaatigut Montreal International First Peoples’ Festival, 'Best Nordic Documentary Short' på Nordic Star Film Festival aamma 'Best Climate Action Film' Arctic Film Festivalimi pingaarnertut nersornaaserneqarpoq.
Filmilu Mexicomi nersornaaserneqareerneraniit nunat tamalaat akornanni filmiliortartuni nuannarineqarluarpoq.
