Aasianni ikuallattoq qaminneqavittoq

Kalaallit Nunaanni Politiinit paasissutissanik nutaanik nalunaaqutaq 22.05 nutarterneqarpoq

Tusassip politiinut upalungaarsimasunullu attavilersuinerani qanittukkut attaveerutissasoq, sarfalersuinerli nalinginnaasumik ingerlaqqilerpat attaviit aaqqissasut, nalunaaqutaq 21.41 Facebookikkut paasissutissiissutigaa. Attaveqannginnerannili politiit attavigineqarnissaat pisariaqartinneqarpat 70 14 48 sianerfigineqarsinnaasoq, Kalaallit Nunaanni Politiit ataasinngornermi unnukkut nalunaaqutaq 22 paasissutissiissutigaat.

Ikuallattoq tamarmi qamivinneqarpoq, pujorneralu unitsinneqarluni, vagtcentralimi aqutsisoq, politikommissæri, Brian Thomsen paasissutissiivoq. Politiit Aasianni oqartussat qanimut attaveqarfigigaat taassuma oqaatigaa.

Kommune innaallagiamik pilersuinerup uninnganera sivisussagaluarpat innuttaasunut imermik kialaarfissamillu neqerooruteqarnissamut piareersimavoq. Tamatuma saniatigut Nukissiorfiit illoqarfiup ilaa suli innaallagiaqanngitsoq allappaat, innuttaasullu innaallagissamik sipaarnissaannik kaammattuuteqarfigalugit.

- Ikuallannerup atortorissaarutit ilaat ajortissimavai.  Nukissiorfimmiilli suli sulissutigineqarpoq ajutoornermi pilersuut tamakkiisumik pilersuisinnaanissaa, Nukissiorfiit facebookimi quppernermini allappoq.

Illoqarfiup katersortarfia kialaarfigineqarsinnaaniassammat kiassarneqaleruttortoq, Kommune Qeqertalik nalunaaqutaq 20.50 paasissutissiivoq. Innuttaasullu tamarmik tikilluaqqusaasut allapput.

Katersortarfiup nalunaaqutaq 21.30 kiatsinnissaa naatsorsuutigineqarpoq.

Tusassip sarfamik sipaarniarnissartik pissutigalugu innuttaasunut datakkut attaviit killeqartillugit, Facebookikkut paasissutissiissutigaat. Innuttaasulli suli sianersinnaallutillu SMS-ersinnaapput.

- Atortorissaarutit nal. akun. 2-3 qaangiuppata sarfaarussapput Politiit Upalungaarsimasullu attaviit sunnigaassallutik.  

Nalunaaqutaq 18.52 nutarterneqarpoq

Aasianni ajutoortoqarnera pissutigalugu innaallagiamik pilersuineq uninngagallarpoq

Nukissiorfiit Facebookikkut ataasinngornermi unnukkut nalunaaqutaq arfinernut allapput.

Nukissiorfiit ‘ajoqutaasumik aaqqiiniarlutik suliaqarlutik’ aamma paasissutissiissutigaat.

Aasianni ikuallattoqarneranit videot arlallit Facebookikkut maanna ingerlaartinneqarput. Uani Michael Binzerip video saqqummersitaa ilaatigut isiginnaarneqarsinnaavoq.

Pilersuisoq pisiniarfiup ikuallattumut qanippallaarnera pissutigalugu pisiniarfik matusoq, Facebookikkut ataasinngornermi unnukkut nalunaarutigaa.

Kommune Qeqertaliup innuttaasut ikuallattoqarfiusumut ussatissanngitsut aamma annaassiniartut ambulancellu aqqutissaat assersorneqassanngitsoq kaammattuutigaa.

Kalaallit Nunaanni Politiit ikuallattoq qaminneqartoq, sulili pujuliungaatsiartoq ataasinngornermi unnukkut nalunaaqutaq 18.52 paasissutissiissutigaat.

- Ikuallattoqarneranut pissutaasoq suli ilisimaneqanngilaq, politiilli suliaq misissuiffigigaat, vagtcentralimi aqutsisoq, politikommissæri, Brian Thomsen oqarpoq.

Nukissiorfiit illutaata iluani ikuallattoqarani eqqaani ikuallatoqartoqarsimasoq, politikommissæri oqarpoq.