Kalaallit Illuutaanni qinersinissamut oqallinnermi oqalutseqarniarnerup ajornartorsiutaanera ukkatarineqartoq

Novembarip 18-iani kommuninut qinersisoqarnissaanut Aarhusimi Aalborgimilu Kalaallit Illuutaasa qinersinissamut oqallitsitsinissaminnut marlunngornermi unnukkut qineqqusaartunut matut amaassavaat.

Kommunini taakkunani marlunni innuttaasut kalaallisut tunuliaqutaqartut suna soqutigineraat tassani ukkatarineqassapput, najukkamilu politikerinut apeqquteqarnissaq periarfissaassaaq.

- Aarhus Kommunemi inuit kalaallisut tunuliaqutallit 1.100-t sinnilaarlugit najugaqarput, toqqammavitsinnilu toqqissisimanartuni naapinnissaannut, innuttaasunullu kalaallinut tunngasut oqallisigineqartussat pillugit tusarnaarnissaannut periarfissinneqarnissaat pingaaruteqarpoq, Aarhusimi Kalaallit Illuutaanni pisortaanerugallartoq Marie Kahlig oqarpoq.

Danskit partiiviniit assigiinngitsuniit qineqqusaartut 17-it Aarhusimi aaqqissuussinermi peqataassapput. Illumik atuisuusut assigiinngitsut soqutigisaat malillugit aaqqissuussinermi oqallisigisassat arfineq-marluk toqqarneqarput, Marie Kahlig oqarpoq.

Oqallisigisassat ilaat tassaavoq meeqqat inuusuttullu qanoq kalaallit oqaasiinik ilinniartinneqartiginissaat qulakkeerneqassanersoq.

- Ilaqutariit kalaallisut tunuliaqutaqartut namminneq oqaatsiminnik ilinniartitaanissaat ajornartorsiutaasoq misigisarparput, atuartunut qassiinut ilinniartitsisussamik nassaaqqaartariaqarneq piumasaqaataammat taamaalilluni aallartitsinissaq ajornakusoortorujussuusarluni. Taamaammat meeqqanut kalaallinut namminneq oqaatsiminnik ilinniartitaanissaat piviunngilaq, naak pisinnaatitaaffiugaluartoq, taanna oqarpoq.

Oqalutseqarnissamut neqeroorfigineqarneq ajorput

Aarhusimi oqallisigineqartussaq alla tassaavoq ilaqutariit pillugit suliat.

- Qanoq ililluta angerlarsimaffiup avataanut inissiisarnerni, aamma angerlarsimaffiup avataanut inissiinerni suliani sullissinermi sumiginnaaneq pinngitsoortissinnaaneripput, kiisalu illersuisoqarnissap oqalutseqarnissallu isumagineqarnissaa inatsisillu malinneqarnissaa, Marie Kahlig nangippoq.

Danmarkimi kalaallit meerartaannik angerlarsimaffiup avataanut inissiisarnerpassuit angerlarsimaffiup avataanut inissiinermut aaqqissuussinermik isornartorsiortitsivoq, tassani kalaallit angajoqqaat arlallit misissuisoqarnerani oqalutseqarsinnaasimanatik ilaatigut oqaluttuarput.

Tamatumunnga ilanngullugu kalaallit innuttaasut peqqinnissaqarfiullu akornanni ataatsimiinnerni oqalutseqarniarneq ajornartorsiutaasortaaq, Marie Kahlig oqarpoq.

- Innuttaasut kalaallisut tunuliaqutaqartut nakorsamik oqaloqateqalernermi imaluunniit napparsimmavinni nakorsiarnerini oqalutseqarnissamik neqeroorfigineqartuaannannginnerat, aamma illersuisoqarnissap iluaqutaanera sianigineqartuaannannginnera ajornartorsiutaavoq, taanna oqarpoq.

Assigiinngisitsinermik akiuiniarneq

Aalborgimi Kalaallit Illuutaanni qinersinissamut oqallitsitsinissami pilersaarutini oqallisigineqartussamik peqarpoq. Danmarkimi Jyllandip avannaa nunap ilaraa nunap inoqassusianut sanilliullugu inuit kalaallisut tunuliaqutallit amerlanerusut najugaqartut. 

- Peqqinnissaqarnermut aaqqissuussinermi kalaallinut naligiinnerunermik pilersitsinissamut qanoq taakkua (politikerit, aaqq.) ikiuunniarnersut pillugu apeqquteqassaagut, inunnimmi amerlasuunit paatsoorneqartutut kinaassusersiornermillu misigisimasunit kalerrinneqarpugut. Oqalutsissarsiortoqartarsimanngilaq naak kissaatigineqaraluartoq, Aalborgimi Kalaallit Illuutaanni pisortaq Jeppe Bülow Sørensen oqarpoq.

Najukkami politikerit suut isumagissaneraat, aaqqissuussaq sioqqullugu illumi atuisuusut Kalaallit Illuutaannit aperineqarput.

- Taakkunannga ilaat uteqqittoq tassaavoq, innuttaasunut suliffissarsiuussisarfimmut (jobcenterimut) attuumassuteqartunut tunngasoq. Suliffimmik misiliinerpassuarni iluamik erseqqissaavigineqarnani, aaqqissuussinermi iluamik paasineqarnani unittooqqasarneq amerlasuunit misigineqartarsimasoq. Tamakkuupput ilaatigut iliuuseqarfigerusutavut, Jeppe Bülow Sørensen oqarpoq nangillunilu:  

- Aalborgimi kalaallinik assigiinngisitsinermik nikassaanernilu akiuiniarnermi qanoq suleriuseqartoqartarnersoq, tamatumunnga aaqqiissutissamik kommuni qanoq suliniuteqassanersoq soqutigaarput.

Aarhusimi Kalaallit Illuutaanni aaqqissuussaq marlunngornermi nalunaaqutaq arfineq-marlunniit qulingiluanut pissaaq, Aalborgimili Kalaallit Illuutaanni aaqqissuussineq tallimanut qiteqqunneraniit arfineq-marlunut qiteqqunneranut pissalluni.