Jens-Frederik Nielsen kuultiusumik Nersornaasigaasoq
- Piffissami unammillernarfiusumi aqutsinerit neriuuteqarnermik pilersitsisarsimavoq. Erseqqissumik unneqqarissumillu attaveqarsinnaassutsit tutsuiginninnermik pilersitsivoq aalajangersinnaassutsillu tamatsinnut siunissamik pitsaanerusumik anguniagaqalersitsivoq.
Inatsisartut siulittaasuat, Kim Kielsen (attaviitsoq), tusagassiuutinut nalunaarummi taama allappoq.
Taassuma naalakkersuisut siulittaasuat, Jens-Frederik Nielsen (D), kuultiusumik ataasinngornermi Nersornaaserpaa.
Pingaartumik USA-p nunattalu akornanni pissutsinut atatillugu isumaginninnera pissutigalugu, naalakkersuisut siulittaasuat nersornaasigaavoq.
- Minnerunngitsumik Kalaallit Nunaata nunarsuarmi sumi inissisimanini pissutigalugu nunanullu allanut tunngatillugu naalakkersuinikkut ilungersunartumik inissisimanerani ataatsimoortitsisinnaanermik piginnaasaqarnerit takutissimavat. Naalakkersuinermik ingerlatani ajornakusoortuni aqutsisinnaassuseqarnerit tamatsinnut kajumissuseqalersitsisimavoq, Kim Kielsen tusagassiuutinut nalunaarummi allappoq.
- Kalaallit Nunaat sinnerlugu malunnaatilimmik oqaaseqartartuuginnanngilatit aammali attaveqaatinik pilersitsisimavutit nunat ingerlataqartullu assigiinngitsut akornanni suleqatigiinnermik pilersitsiviusumik.
