IA Greenland Airportsip siulersuisuinik taarseeqqusisoq

Greenland Airportsip siulersuisuisa taarserneqarnissaat, Inatsisartuni Inuit Ataqatigiit piumasaraat.
Nunanut allanut timmisartorniartut isumannaallisaanermi Nuummi mittarfimmi misissuiffigineqarsinnaanngikkallarnerannut suliaq pissutaaqataasupilussuusoq, partiimi politikkikkut oqaaseqartartup paasissutissiissutigaa.
Trafikstyrelsenimmi Nuummi mittarfimmi nunanut allanut angalasussat isumannaallisaanermi misissuiffigineqartarnerat unnuaq atorunnaarsikkallaraa, Greenland Airportsip ippassaq ualikkut nalunaarutigaa.
Nuummit nunanut allanut qanittukkut timmisartorniartut Kangerlussuarmi Narsarsuarmiluunniit isumannaallisaanermi misissuiffigineqartarsinnaasut Greenland Airports aamma nalunaarpoq.
Nunap iluani timmisartortussanut sunniuteqassanngilaq.
Taamaattoqarpoq, sulisut nunanut allanut angalasussanik misissuisartussat ilinniartinneqarnerat piumasaqaatinut tamakkiisumik naammassinniffiunngitsoq Trafikstyrelsenimit nalilerneqarmat.
Nunanut allanut angalasussat isumannaallisaanermi sisamanngornermi aggustip ulluisa 28-anni misissuiffigineqartaleqqinnissasut, Greenland Airports pingasunngornermi nalunaaquttap ataatsip missaani nalunaarpoq.
Greenland Airportsip atorunnaarsitsinermi inunnut kingunerluutit ajuusaarutigigai, Nuummilu mittarfiup nalinginnaasumik ingerlaqqilernissaanut ilungersuutigigai aamma nalunaarutigineqarpoq.
Inuit Ataqatigiit: Siulersuisut taarserneqarlik
Nuummili mittarfiup sivisuumik piareersaaffigineqarsinnaagaluarluni ingerlanerlunnera sivitsortoq, Inuit Ataqatigiit isumaqarput.
- Inuit Ataqatigiit Inatsisartuni gruppia sinnerlugu Greenland Airportsip siulersuisuunerit taarserneqarnissaat piumasarivarput, Inuit Ataqatigiit politikkikkut oqaaseqartartuat Mariane Paviasen Jensen oqarpoq.
Tamannalu sivisuumik oqallisigisarsimagaat taassuma paasissutissiissutigaa.
- Tassalu piffissanngorpoq, taama saqqummiunnissaa.
Nuummi mittarfimmi nunanut allanut angalasussat isumannaallisaanermi misissuiffigineqartarnerata atorunnaarsinneqarallarnera siulersuisunik taarsiinissamik piumasaqarnermut pissutaaqataasupilussuusoq, Mariane Paviasen Jensenip aamma paasissutissiissutigaa.
- Taanna naammaginanngitsorujussuuvoq. Piffissaq sivisungaatsiartorujussuaq atorlugu piareersarnikuusimasussaanerigaluartik atorsimanngimmassuk, tassuuna killinnera assut uggornarpoq.
Tamanna angalasunut Greenland Airportsimilu sulisut pissutsinut pisuussuseqanngitsut suliniarnerannut kingunerluttartoq taassuma eqqaasitsissutigaa.
Politikerit ulluinnarni aqutsisunik atorfinitsitsisartunik taarsiisinnaasut
Politikerilli ingerlatseqatigiiffinni ulluinnarni ingerlatsisunik taarsiisinnaanngilaat. Ulluinarnili ingerlatsisunik atorfinitsitsisartunik taarsiisinnaapput.
- Siulersuisut taakkuusaramik qullersanik atorfinitsitsisussat. Taavalu taakkunani aaqqissuunneqartarluni sulisut ulluinnarni qanoq ingerlariaaseqassanersut. Massakkumullu suliassaq kivinneqanngitsoorsimarpasippoq.
Greenland Airportsip siulersuisuini ilaasortat arfiniliupput. Taakkunani sisamat naalakkersuisunit toqqarneqarput, marlullu danskit naalagaaffiannit toqqarneqarlutik.
Nunatsinnik ilisimasaqarnerusut kalaallillu amerlanerit siulersuisuniinnissaat Inuit Ataqatigiit kissaatigigaat, Mariane Paviasen Jensen oqarpoq.
Piginnaasalli pingaarnerpaajusut, taanna nangilluni oqarpoq.
- Piginnaasaat apeqqutaajumaarput. Inunnik aalajangersimasunik eqqarsaateqaavinngilagut, taamaallaat piginnaasat misilittakkallu qanoq inneri pinngitsoornatik aallaaviussapput.