Isornartorsiuisoqareersorlu pinerluuteqarsimasunut inissiisarfiit nutaat pineqaatissiinerillu sakkortunerusut

Danskit inatsiseqarnermut ministeriat, Peter Hummelgaard (Socialdemokratiet) aamma inatsiseqarnermut naalakkersusioq, Naaja Nathanielsen (IA) Hans Egedep Illuata eqqaani sanileriillutik ataasinngornermi ualikkut kingusissukkut oqarput.

Taakku 850 millionit koruunit nunatsinni politiini eqqartuussiveqarfinnilu qanoq aningaasaliissutigineqarnissaat saqqummiuppaat.

Inatsiseqarnermut ministeri danskit tungaanniit ukiorpassuarni aningaasaliisoqarnani maannakkut sooq aningaasaliinialeriataarnerat pillugu aperineqarami tamanna naalagaaffiup milliardilinnik sinneqartooruteqarneranik pissuteqarnerarpaa.

- Aningaasaliinissamut maanna periarfissaqarpugut. Naalagaaffeqatigiinni tamarmi atugassarititaasut sapinngisamik qaffanneqarnissaat uanga naalakkersuisullu anguniagaraarput, Peter Hummelgaard oqarpoq.

Europami Siunnersuisoqatigiit Naalliutsitsineq pillugu ataatsimiititaliaata pinerluuteqarsimasunut inissiisarfinni inissaalatitsineq isornartorsiornikuuaa. Aamma Sisimiuni pinerluuteqarsimasunut inissiisarfimmiittut oqoqarnera asbesteqarneralu pissutigalugu sapaatip akunnerata ingerlanerani amerlulertarnerat KNR-ip nutaarsiassiarinikuuaa.

Pinerluuteqarsimasunut inissiisarfinni inissat nutaat 70-it pilersinneqassasut maajimi saqqummiunneqarpoq. Tassanilu pinerluuteqarsimasunut inissiisarfinnik piffissamut naleqquttunik sanaartortoqassaaq.

Inissallu naammassisimaleriarpata pineqaatissiisarnermut sinaakkutigineqartoq annerpaamik ukiunik qulinik pineqaatissinneqarsinnaanerannit qaffanneqassasoq naalakkersuisut anguniagaraat.

Pinerluuteqarsimasunut inissiisarfiit nutaat – oqullu annikinnerusoq

Inatsiseqarnermut ministerip naalakkersuisullu tusagassiortunik katersortitsinerminni pinerluuteqarsimasunut inissiisarfinnik nutaanik suliaqarneq sumi qaqugulu aallartinneqassasoq aalajangersumik akissuteqarfigisinnaanngilaat, pinerluttunik isumaginnittoqarfimmimi suut pisariaqartinneqarnersut sumilu sanasoqartarnissaa isumaqarnerpaassanersoq suli oqaluuserineqarmat.

- Kisianni oqaatigisatit (Sisimiuni pinerluuteqarsimasunut inissiisarfimmi oqoqarnera aaqq.) Kalaallit Nunaanni pinerluttunik isumaginnittoqarfimmi inissaqartitsinissap annertusarnissaanut salliutitsinissatsinnut tunngavilersuutit arlallit ilagaat taamaammat pisariaqartunik aningaasassarsivugut, Peter Hummelgaard oqarpoq.

- Tassa taamaarrappugut naajorarneqalerrappugut taavalu niaqorluttarluta quersornerlu, arlariippugut taamaattugut, Sisimiuni inissinneqarsimasut oqaaseqartartuat juunimi oqarpoq. Assi © : Sisimiut anstalt

Pinerluuteqarsimasunut inissiisarfinniittunut init pitsaanerulersinnaaneranik oqaaseqarfigisinnaagussigit qanoq oqarfigerusuppisigit?

- Tamakkiisumik oqaatigissagaanni pineqaatissinneqarsimasunut atugassarititaasut pitsaasuunissaannut pisinnaatitaaffiuvoq, Naaja Nathanielsen oqarpoq, nangillunilu:

- Aningaasat uku atorneqarnissaanut aallartisaleruttorpugut, anguniakkatta angunissaanut piffissaq sivisulaassaaq. Inissiisarfinni sulisunut ullut tamaasa suliartortartunut aamma tunngassuteqarput. Taakku pitsaasumik aamma atugassaqartinneqassapput.

Pineqaatissiisarnermut sinaakkutit qaffasinnerusut

Pinerluuteqarsimasunut inissiisarfinnik sanaartornissap oqaluuserineqarnerani inatsiseqarnermut ministerip sammisaq alla aamma qaqippaa – tassa pineqaatissiisarnermut sinaakkutit qaffasinnerusut.

- Pinerluttunik Isumaginnittoqarfiup tungaaniit pineqaatissiisarnerup qaffasissusaanik annertusiinissaq kissaatigiuarneqarpoq, taamaaliornikkut pineqaatissiissutaasoq pinerluuteqarnerup ilungersunassusaanut naleqqunnerulissalluni, Peter Hummelgaard oqarpoq.

Inissinneqarsimasulli piffissami sivisunerusumi inissinneqartussanngorunik inissat amerlanerusut suli pisariaqartinneqalernissaa aporfiusarsimavoq.

Maannali danskit naalagaaffiata karsianit aningaasassarsisoqarneratigut inatsisinik pitsanngorsaasoqalersinnaavoq, taamaalilluni pineqaatissiisarnerup sinaakkutaa qaffanneqassalluni.

- Taamaaliornikkut amiilaarnarnerpaamik peqqarniinnerpaamillu pinerluuteqarsimasut pineqaatissinneqarnerat aamma naleqqunnerulissalluni, Peter Hummelgaard oqarpoq.

Naalakkersuisut pineqaatissiisarnermut sinaakkutip qaffanneqarnissaa aamma kissaatigaat, uanilu pinerluuteqarneq aalajangersimasoq eqqarsaatigaasiuk?

- Tamanna ukiorparpassuarni suliniutigingaatsiarnikuuarput, pineqaatissiisarnermut sinaakkutip qaffasinnerpaaffigisaata qaffanneqarnissaa noqqaassutiginikuuarput, maannalu taamaaliortoqalerpoq, Naaja Nathanielsen oqarpoq, nangillunilu:

- Sivisunerpaamik ukiunik qulinik pineqaatissiisinnaaneq annikippallaarsoraarput, uanilu pinerluut aalajangersimasoq eqqarsaatiginagu tamakkiisumik eqqarsaatiginnippugut. Pineqaatissiisarnerup qaffasissusaanut qaffaaneq eqqartuussiviit suliaqarnerannut sinaakkusiisinnaassasoq neriuutigaarput.