Islandip Qaqortullu akornanni aasaanerani sapaatip akunneranut sisamariarluni timmisartuussisoqartassasoq

Qaqortumi mittarfik nutaaq upernaamut ammassaaq, Icelandairillu Islandip nunattalu kujataata akornanni aasaanerani sapaatip akunneranut timmisartuussisarnini amerliniarpai, timmisartuutileqatigiiffik allappoq.

Allattoq Birgitte Kjeldsen

oktobarip 29-at 2025 12:42

Nutserisoq Connie Fontain

- Qaqortoq timmisartumut tikilluarit!

Islandimiut timmisartuutileqatigiiffiata, Icelandairip Qaqortumut Qaqortumiillu timmisartuussisarnitik 2026-mit amerliniarlugit Facebookikkut nittartakkaminilu taama nalunaarutigaa.

- Kalaallit Nunaata kujataanut juunimit aasaanerani timmisartuussisalissaagut, uanilu Islandip Qaqortullu akornanni sapaatip akunneranut sisamariarluta timmisartuussisassalluta, Icelandair facebookikkut allappoq.

Aamma atuarukNarsarsuup siunissaa pillugu nalorninerujussuaq

Qaqortumi mittarfik nutaaq ukiumi nutaami apriilimi piareertussatut pilersaarutaavoq. Mittarfiup nutaap Narsarsuarmi mittarfik Icelandairip aasaanerani sapaatip akunneranut marloriarluni timmisartuussiffigisartagaa taarsissavaa.

Icelandairip nunatta kujataanut timmisartuussisarnermi saniatigut Kulusummut, Ilulissanut Nuummullu aamma timmisartuussisarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.