Sipineq+ Danmarkimiit 1,5 millionit koruuninik aningaasaliiffigineqartoq

Peqatigiiffik kajumissutsimik suliniuteqartartoq Sipineq+ Danskit naalagaaffianniit millionit koruunit aappaa avillugu aningaasaliiffigineqarpoq. Taakku ukiuni marlunni tulliuttuni peqatigiiffimmik ingerlatsinermut atorneqassapput.

Allattoq Ivalu Nivi Johansen

oktobarip 28-at 2025 15:40

Nutserisoq Karla Heilmann

Peqatigiiffimmi LGBTQIA+-mi oktobarip 23-anni nuannattoqarpoq, Danmarkimi Aningaasanut Inatsit pisortatigoortumik saqqummiunneqarmat.

Peqatigiiffimmi 1,5 millionit koruuninik ukiuni tulliuttuni marlunni aningaasaliiffigineqarpoq. Aningaasaliissutit nunatsinni LGBTQIA+-it pisinnaatitaaffiinik nukittorsaataassapput.

– Aningaasaliissuteqarnikkut alloriaqqissinnaalerpugut, tassa suliamut piukkunnarnerusunik ataavartumillu aaqqissuussinermik pilersitsisinnaanngorpugut, inatsisit maleruarnissaannut ulluinnarnilu naligiissitaaneq qulakkeerniarlugu, taama Sipineq+imi siulittaasoq Qillaq Olsen tusagassiuutinut nalunaarummi oqarpoq.

Peqatigiiffimmi 2026-mi 2027-milu aningaasartuutissanut aningaasat atorneqassapput aamma naligiissitsiniarluni suliniuteqarnermi, toqqissisimatitsiniarluni malunnaateqarnerulersitsiniarlunilu iliuuseqarnermi pingaarutilittut alloriarnerusutut isigineqassasoq, Qillaq Olsenip erseqqissaatigaa.

ANINGAASAT MAKKUNUNNGA ATORNEQASSAPPUT:

• Nuummi allaffeqarfeqalissaaq, peqatigiiffiup sulineranut qitiusussamik aamma LGBTQIA+-nut toqqissisimaffiusumik.
• Pissutsit pitsaasut ingerlaannaqqullugit ullup affaani sulisunik atorfinitsitsineq.
• Nunanit tamalaanit suleqatigiinneq aqqutigalugu Nuuk Pride 2026-miit 2029-mut ineriartortillugulu ingerlatissavarput.
• Nuna tamakkerlugu paasissutissiisarneq siunnersuinerlu annertusarneqassapput.

Tusarfik: Sipineq+

Aningaasaliissutit naligiissitaanermut suliaqarnissamut nukittorsaataassapput

Soorlu KNR-ip siornatigut allaaserereeraa, peqatigiiffiup taaguusersuutinik ineriartortitsinissamut Oqaasileriffik suleqatigalugu ilaatigut suliaqartut. Tamatumunnga ilanngullugu peqatigiiffik IPS – Inuit Pisinnaatitaaffiinut Kalaallit Nunaanni Siunnersuisoqatigiit suleqatigalugitvideolianik paasissutissiissutinik ineriartortitsipput.

Naligiissitaanermut assigiinngisitsinermullu inatsit nutaaq atuutilermat nunatsinni siuariartoqarpoq. Amerlasuulli suli immikkoortinneqarneq, kiserliorneq toqqissisimaffiusunullu isersinnaannginneq misigisaraat, Sipineq+ tusagassiuutinut nalunaarummi allapput.

- Ukiut ingerlaneranni tapersersuinermut, suleqatigiinnermut malunnaateqarnerulernermullu peqataasimasut tamaasa, kajumissutsiminnik ikiuisut, kattuffiit peqatigiiffiillu, ilisimasallit aamma Kalaallit Nunaanni Nunanilu Avannarlerni tapersersuisut, qutsavigingaarpavut. Atlantikup Avannaani aningaasaliissutinit aningaasaliissutigineqartut inuiaqatigiit tamarmik peqataaffigisinnaasaannik kissaateqarnerup pimoorunneqarnerata kingunerisarai, taakku allapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.