Naalakkersuisut milliardilinnik taarsiissuteqarnissaannik piumasaqarneq isumaqatigiissitsiniarnermut eqqartuussivimmit itigartitsissutaasoq

Naalakkersuisut isumaqatigiissitsiniarnermut eqqartuussivimmit, aatsitassarsioqatigiiffiup 80 milliardit koruuninik taarsiissuteqarnissamik piumasaqaataa eqqartuussivimmut isumaqatigiissitsiniarfiusumut suliakkiutaasinnaannginnera pillugu,  ukiut pingasut sinnerlugit ingerlareersullu taperserneqarput. 

Taama Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfik tusagassiuutinut nalunaarummi ilisimatitsivoq.

Australiamiut aatsitassarsioqatigiiffiat Energy Transition Minerals (ETM), taamani Greenland Mineralsimik taaneqartartoq, taarsiissutinnannissaminik 2022-mi piumasaqaateqarsimavoq.

Ingerlatseqatigiiffik Kuannersuarni Narsap eqqaaniittumi aatsitassarsiorfiliornissamut periarfissanik 2007-imili misissuisinnaatitaasimavoq.

2021-mi Inatsisartunut qinersisoqarmat aatsitassarsiorfik oqaluuserineqarluarpoq. Uranimik radiop qinngornerinik ulorianartunik akulinnik piiaanissap inerteqqutigineqarnissaanik qinersinerup kingorna Naalakkersuisut nutaat aalajangerput, taamaalillunilu aatsitassarsiorfimmik suliniut unitsinneqarpoq, tamannalu pillugu aatsitassarsioqatigiiffik taarsiiffigitinniarpoq.

Energy Transitions Mineralsilli isumaqatigiissitsiniarnermik suliakkiinera eqqartuussivimmit isumaqatigiissitsiniaasartumit itigartinneqarpoq.

Aamma Australiamiut aatsitassarsiorfiutaata kissaatigisaatut danskit naalagaaffiat suliami peqataasinnaanngitsoq aalajangerneqarpoq.

Oqiliallangaartut

Naalakkersuisut aalajangiineq "naammagisimaartorujussuugaat," aatsitassanut Naalakkersuisoq Naaja H. Nathanielsen (IA) tusagassiuutinut nalunaarummi oqarpoq.

- Soorunami suliassap tassunga tunngasortaa maannakkut naammassinera ajugaanerpullu oqiliallannartorujussuuvoq. 

Suliassalli eqqartuussivinni ingerlaannartussaanera erseqqissaatigaa. Aatsitassarsioqatigiiffimmi aamma Kalaallit Nunaata Eqqartuussivianut Københavnillu eqqartuussivianut suliassanngortitsisimavoq.

- Suliassat taakkua aallartinnerminni killiffeqarput, taamaattumik aqqut suli sivisusussaavoq. Minnerunngitsumillu ajugaaneq manna pingaaruteqarpoq aammalu aningaasartuutit Namminersorlutik Oqartussat suliassamut aningaasartuutigisimasai maannakkut Greenland Minerals A/S-imit matussuserneqartussanngorput. Suliassaq tunngaviusumik aalajangigassaasoq Naalakkersuisut suli isumaqarput, maannakkullu nukissaqaleqqillutik ingerlaqqissapput, Naaja H. Nathanielsen oqarpoq.

Suliassaq isumaqatigiissitsiniarnermut eqqartuussivimmut suliakkiissutiginiarneqalermat Naalakkersuisut "tupaallaatigisimagaat", Naalakkersuisut nalunaarummi aamma allapput.

Tassami "Naalakkersuisut naliliillutik aalajangiineri eqqartuussivinnut taamaallaat suliakkiissutigineqarsinnaammata", taamaattumik aalajangiineq "naatsorsuutigineqareerpoq".

Taamaakkaluartorli isumaqatigiissitsiniartarfimmut suliassanngortitsisoqarsinnaavoq.

- Isumaqatigiissitsiniarnermut eqqartuussiviup aalajangiinermini, siunissami apeqqut taanna isumaqatigiissitsiniarnermut eqqartuussiviup piginnaatitaaffiiniittoq eqqartuussivik isumaqassagaluarpat, taarsiissutissap annertuussusissaa pillugu apeqqummut aalajangiinissamut periarfissaqarnissaminut isumaqatigiissitsiniarnermut eqqartuussivik imminut pisinnaatippoq, tusagassiuutinut nalunaarummi allassimavoq.

/ritzau/