Islandimi innermik anitsineq: Den Blå Lagunemiittut qimagussortinneqartut

Islandip kujataata kitaaniittoq pingasunngornerup ullaavani anitsileqqavoq.

Taama Islandimi silasiorfik, nutaarsiassaqartitsivimmut AFP-mut allappoq.

Islandimi nutaarsiassaqartitsiviup RUV-p allaatigisaa naapertorlugu, takornariat ornigarluagaanniittut Den Blå Lagunemiittut ungasinngisaaniittullu tammaarfimmiittut qimagussortinneqarput.

Inuit qanoq amerlatigisut qimagussortinneqartut nalunaarutigineqanngilaq.

Innermik anitsisoqakkajuffiusup Sundhnúkip nalaani anitsisoqartoq, RUV allappoq.

Sumiiffimmi 130-riarluni nunatta nalunaaqutaa naapertorlgu pingasunngornerup unnuaani nalunaaqutaq 00:20 nuna sajussimasoq nalunaarsuutit takutikkaat, Islandimi silasiorfiup nalunaarutigaa.

Islandip illoqarfiisa pingaarnersaata Reykjavikip kilometerinik 50-inik ungasissuseqartumi Reykjanesip qeqertaasaa inissisimavoq.

Kikkut eqqugaaneri

Minney Sigurðardóttir, tassaasoq Islandimi pinngortitami navianartut pillugit immikkut ilisimasalik, aamma Isladnimi silasiorfiup allaffiani atorfeqartup, anitsinerup sumiiffia iluatsitsinertut nalilerlugu -illoqarfimmut Grindavikimut tassanilu sanaartorfiusunik ulorianartorsiortitsinnginnerarlugu-, nutaarsiassaqartitsivimmut RUV-mut pingasunngornerup ullaavani oqarpoq.

Innermik anitsinerup malitsigisaanik silaannakkut angallannerup allannguuteqarnissaanik suli nalunaartoqanngilaq.

Islandip kujataani innermik anitsinerit ukiuni kingullerni akulikipput, illoqarfiullu aalisartoqarfissuusup Grindavikip innuttai aasiit qimagussortinneqarput.

Illoqarfik 4000-nik siornatigut innuttaqartoq, anitsisoqaqattaarnerata kinguneranik ikitsuinnarnik maanna angerlarsimaffigineqarpoq.

Grindavikip eqqaaniittoq ukiuni kingullerni 900-ni innermik anitsiviunani 2021-mi martsip qaammataani anitseqqippoq. 

Nutaarsiassaqartitsivimmit RUV-mit allaatigisaq naapertorlugu, ukiuni sisamani kingullerni Reykjanesip qeqertaasaaniittoq aqqanilissaarluni anitsivoq.