Iranimi atomimik ilisimatusarfiusorineqartoq Israelip saassuppaa

Israelikkut timmisartui sorsuutit 60-init amerlanerusut sisamanngornerup unnuaani Iranimi sakkutooqarfinnut saassussipput.

Allattoq Ritzau

juunip 20-at 2025 08:13

Nutserisoq Tabetha Kreutzmann

Sisamanngornerup unnuaani Israelikkut Iranip illoqarfiisa pingaarnersaanni Teheranimi arlaleriarlutik saassussisimapput.

Reuters naapertorlugu Israelip sakkutooqarfiat taama ilisimatitsivoq.

Kattuffiup SPND-p qullersaqarfia Israelikkut saassutaasa ilagaat.

SPND Iranimi illersornissamut ministereqarfiup ataaniippoq ilaatigullu ilisimatusarnermik suliaqarluni.

USA Israelilu naapertorlugit kattuffiup ilisimatusarnerata ilaa atomimik sakkussiassanik ineriartortitsinermut tunngassuteqarpoq.

- Israelimi tusagassiorfik Times of Israel naapertorlugu SPND Iranip sakkutuuisa atortussaannut tunngasunik teknologiimik sakkussianillu nutaaliaasunik ilisimatusarnermut ineriartortitsinermullu qitiusutut IDF-ip taavaa.

- Mohsen Fakhrizadehimit (Iranimi atomimik ilisimatusartumit, aaqq.), Iranip atomimik sakkussialiornernik suliniutaanut tunngaviliisumit, 2011-mi pilersinneqartoq aamma oqaatigineqarpoq.

Nalunaaruteqartoqanngitsoq

Israelikkut saassussinissamik nalunaarutaat Iranip SPND-llu ingerlaannaq qisuariarfiginngilaat.

Qullersaqarfik qanoq ajoquserneqartigisimanersoq nalunaarutigineqanngilaq.

Israelip sakkutooqarfia naapertorlugu timmisartut sorsuutit 60-init amerlanerusut unnuaq taanna saassussinermut atorneqarsimapput, taakkualu qaartartut 120-t missaat Iranimut nakkartissimavaat.

Sapaatip-akunnerata siuliani sisamanngornerup unnuaani Israelip Iranimik saassussineraniilli — nunap atomimik sakkussiaqartutut pissaaneqalerrnissaa pinngitsoortinniarlugu saassussinerugunartumit — Israelip Iranillu akornanni akerleriinneq atuutilerpoq.

Iranip atomimik sakkussiaqartutut pissaaneqarniartutut oqaatiginninneq ilumuunnginnerarpaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.