Inuit sisamat toqutsisimasutut Nanortalimmi pasillerneqartut

Inuit sisamat, angummut toqungasumut Nanortalimmi ippassaq siumorneqartumut, toqutsisimasutut pasillerneqarput. Inuit pingasut ulluni 27-ni tigummigallagassanngortinneqarput, sisamaat akunnerni 72-ini tigummigallagassanngortinneqarluni.

Allattoq Nicole Sander Bertelsen

oktobarip 03-at 2026 09:10

Nutserisoq Medea Olsen

Angut 37-nik ukiulik Nanortalimmi toqungasoq ippassaq siumorneqarpoq. Politiit angutip toqunera 'pasinartutut' tusagassiuutinut nalunaarummi allaaseraat.

Aamma atuarukNanortalimmi toqusoqarnerani pasinartoqartoq – politiit suliamik misissuisut

Politiit tusagassiuutinut nalunaarummi nutaami, arfininngornerup unnuaani saqqummiussaminni nalunaarput, inuit sisamat toqutsisutut pasillerneqarlutik tigusarineqarsimasut.

- Pineqartut tassaapput arnat marluk, aappaa 43-nik ukiulik aappaa 22-nik ukiulik kiisalu angutit marluk 18-inik ukiullit, politiit tusagassiuutinut nalunaarumminni kingullermi allapput.

Pasillerneqartut taakkua sisamat, Eqqartuussisoqarfik Kujallermi matoqqasumik tallimanngornermi unnukkut sassartinneqarput. Unnerluutigineqartut ilaat pingasut ulluni 27-ni tigummigallagassanngortitaapput. 43-nik ukiullip ulluni pingasuni tigummigallarneqartussanngortinneqarnissaa eqqartuussiviup aalajangerpaa.

- Sukumiisumik misissuineq suli ingerlanneqarpoq, suliarlu tamaviaarluta suli suliaraarput. Suliami misissuisoqarnera pissutigalugu, qanoq pisoqarsimanera pasilliinermullu tunngavigineqartut annerusumik oqaaseqarfigisinnaanngilagut, politiit pisortaata tullia Malik Sandgreen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.