Tunuarnerup kingorna: Inuit Pisinnaatitaaffii pillugit Siunnersuisoqatigiit Inatsisartunut erseqqissumik kaammattuuteqartoq
- Siulittaasutut ingerlaannarusukkaluarpunga.
Tukumminngiaq Olsen Lyberthip Linked-In-ikkut ullualunnguit matuma siorna allaaserisani taama aallarnerpaa.
Taassuma meeqqani nukangasut pingasut, ilaquttani sulininilu ilungersunartumik napparsimareernermi kingorna salliukkusullugit, Inuit Pisinnaatitaaffii pillugit Siunnersuisoqatigiinni (IPPS) siulittaasutut tunuarniuteqarnissani aalajangiuppaa.
Siulittaasup tullia aamma siunnersuisoqatigiinnit tunuarniuteqarpoq. Inuiaqatigiinni toqqakkatut suliassaqartitaanissamut pisinnaatitaaneq ajornerat aningaasarsiallu tungaatigut annaasaqaateqarsinnaaneq ilaatigut pissutigalugit.
Tamannalu Inuit Pisinnaatitaaffii pillugit Siunnersuisoqatigiinni niuernermut ataatsimiititaliap Inatsisartunut kaammattuuteqarneranik kinguneqarpoq. Inatsisartut ilaasortat innuttaasutut pisassaqartillugit sulinngiffeqarsinnaanissaannik qulakkeerinneqataanissaat siunnersuisoqatigiinnilu inatsisinik nutarsaasoqarnissaa siunnersuisoqatigiinnit kissaatigineqarpoq
- Ukiuni 14-ini Kalaallit Nunaanni inuit pisinnaatitaaffiinik suliaqarnerup ineriartortinnissaanut suleqataasimavugut, kisianni siunnersuisoqatigiit sulinerminni atugassarititaat naammattumik ineriartortinneqarsimanngillat. Ilaasortat inuiaqatigiinnik sullissinertik pissutigalugu isertitassaminnik annaasaqarsinnaappata, politikkikkut iliuuseqarnissaq pisariaqarpoq, Siunnersuisoqatigiit tusagassiuutinut nalunaarummi allapput.
Suliassaqartitaaneq Inatsisartunit Ukiakkut ataatsimiinnermi oqaluuserineqassasoq
Siunnersuisoqatigiit nalunaaruteqarneratut siornatigullu taaneqareersutut, pisinnaatitaaffiit amigaatigineqarnerat kingullertigut soraarniuteqarnernut pissutaaqataapput. Taamaattumik maannakkut kaammattuuteqartoqarpoq.
Ilaasortat inuiaqatigiinni toqqakkatut massakkut sulinissaminnut periarfissaqartinneqanngillat, taamaattumik nalinginnaasumik suliffimmit tunngaviusumik sulinngiffeqarsinnaatitaanngillat.
Taamaattumik Siunnersuisoqatigiit suliaannut peqataaneq suliffeqarfiup ajunngisaartarneranut arlalitsigut attuumassuteqartarnera aningaasarsiassanillu annaasaqaataakkajusinnaasartoq Siunnersuisoqatigiinnit nassuiaatigineqarpoq. Pingaartumik ilaasortanut Nuup avataaneersunut ataatsimiinnernut peqataaneq angalanerillu, aningaasarsiassanik annaasaqaataasinnaasartut, taakkunannga erseqqissaatigineqarpoq.
Allannguuteqartoqarnissaalu piviusunngoratarsinnaavoq. Inatsisartummi pilersaarutigineqartut naapertorlugit, Inuit Pisinnaatitaaffii pillugit Siunnersuisoqatigiinni ilaasortat inuiaqatigiinni toqqakkatut sulisinnaatitaasalernissaat Inatsisartunit Ukiakkut ataatsimiinnermi oqaluuserineqassaaq, tamannalu siunnersuisoqatigiinnit qilanaarineqarpoq.
- Inuiaqatigiinni toqqakkatut sulisinnaatitaasarnissaq Inatsisartunit minnerpaatut maanna qulakkeerneqartussanngortoq, Siunnersuisoqatigiit isumaqarpoq.
