Inuit illoqarfinnut nutsernerat inatsisitigullu allannguinerit KNI-mut millionilikkaanik amigartoorutaasut
KNI-p, nunatsinni pilersuinerup tungaatigut ingerlatseqatigiiffiup annerpaap, ukiumoortumik nalunaarusiamini 2024/2025-moortumut amigartoorutit, akileraarutissat ilanngaannagit, 75 millionit koruuniusut saqqummiuppai.
Ingerlatseqatigiiffik naapertorlugu ukioq nunatsinni inuiaqatigiinni annertuunik allannguuteqarfiusoq peqqutaavoq.
Inuit illoqarfinnut nutsernerat, attaveqaatit nutaat ingerlatsivimmullu atugassarititaasut allanngorneri malunnaatilimmik sunniuteqarput - pingaartumik nioqquteqarnermi ingerlatsivimmi, nuna tamakkerlugu nioqqutissanik pilersuisumi, ingerlatseqatigiiffik tusagassiuutinut nalunaarummi allappoq.
- Kiffartuussinissamik isumaqatigiissutitta kiisalu aningaasaqarnitta patajaatsuunissaata oqimaaqatigiissumik inissisimanissaa KNI-mi ilungersuutigisimavarput. Inuiaqatigiinni aaqqissuussaanikkut allannguutit annertuumik sunniinerlunnerat naammattumik pakkersimaarsinnaasimanngikkipput KNI A/S-imi 2024/25-mi angusat ersarissumik takutippaat, pisortaaneq Jeppe Jensen tusagassiuutinut nalunaarummi nalunaarpoq.
Nioqquteqarnermik ingerlatsivik eqqugaanerpaasoq
Nioqquteqarnermik ingerlatsivik 92 millionit koruuninik amigartooruteqarpoq.
Unammillernartut ilaat tassaapput poortuutissat pillugit nalunaarut nutaaq, immiaaqqanik imermillu agguaassinermi isertitaarutsitsisoq, kiisalu Nuummi mittarfissuaq nutaaq ammarneqarmat Kangerlussuarmi akitsuuteqanngitsumik tuniniaanerup atorunnaarsinneqarnera.
Inuittaaq illoqarfinnut nutsernerat pissutigalugu nunaqarfinni avinngarusimasunilu pisiniartartut ikiliartorput - taamaattumillu KNI-p pisiniarfiutimi sanaartugaatimilu nalingat 76 millionit koruuninik nalikillisimavaa.
- Tunngaviusumik isummerfigineqartariaqarpoq, illoqarfiit, nunaqarfiit inoqarfiillu isorliunerusut qanoq kiffartuunneqassanersut – KNI-mi ilutsinni pingaarutilinnik isumaliuutissaqarpugut aammalu Namminersorlutik Oqartussat peqatigalugit, tusagassiuutinut nalunaarummi Jeppe Jensen oqarpoq.
2001-imiilli nunaqarfinni isorliunerusunilu innuttaasut ukiumut 10 procentit missaannik ikiliartortartut sulilu ikiliartortut KNI allappoq – tamatumalu malitsigisaanik siunissami pingaarnertut ingerlatsivigisaneersunit isertitakinnerulernissaq ingerlatsiviup naatsorsuutigaa.
Ikkummatissat amigartoornermik annikillisitsilaartut
Ikummatissaqarnermik ingerlatsivik 16 millionit koruuninik sinneqartoorfiuvoq, ukiulli siuliinit sinneqartoorutit ikinneroqaat.
Angusat annikinnerinut patsisaavoq ukiut siuliini KNI-p Naalakkersuisunik isumaqateqarmigut akigititat qaffatsaalinerisa atorunnaarsinneqarneri, atuisunullu akigititat aalaakkaasuutinnissaasa aalajangiunneqarsimaneri, tamannalu ingerlatseqatigiiffimmut 2024/25-mi 120 millionit koruuninik naleqarpoq.
Naak amigartooruteqartoqaraluartoq Jeppe Jensen isumalluarpoq.
KNI-mimi inuiaqatigiinni allannguuterujussuit suliffeqarfiup nalaakkumaagai eqqarsaatigalugit pisariaqartunik naleqqussaanerit ingerlanneqalermata.
Niuernerup aningaasaqarnikkut imminut napatissinnaanissaata qulakkeernissaa anguniagaavoq - aammattaarli innuttaasut attaveqaatillu ineriartorneri eqqarsaatigalugit.
- Pilersaarusiornermi suliniutit pisariillisaanerillu arlallit atorlugit 2025/26-mi 50 mio. koruuninik sinneqartoornissaq angusinnaassavarput, taakkulu siunissami suliffeqarfimmi pisariaqartitanut aningaasaliinissamut tunngaviliisuussapput, tusagassiuutinut nalunaarummi Jeppe Jensen oqarpoq.
