Innuttaasut namminneq akiliuteqarlutik influenzamut akiuussuserneqarsinnaalersut

Innuttaasut 65-ileereersimasut, inuit katsorsarneqarsinnaanngitsumik nappaatillit, naartusullu nualluummut COVID-19-imullu akiuussutissamik akeqanngitsumik kapitissinnaasut peqqinnissaqarfiup oktobarimi neqeroorutigaa.

Innuttaasunut aarlerinartorsiunngitsunut nualluummut akiuussuserneqarnissamut – akiliuteqarluni kapitittoqarsinnaanera maanna ammaanneqarpoq. Akiuussuserneqarsinnaanissamut periarfissaq ippassaq ulluni siulliuvoq, akiuussutissamillu tulliani novembarip aqqaneq-aappaanni kapitittoqarsinnaavoq.

- Inunnut nualluummik eqqugaanissamut aarlerinartorsiunnginnerorusuttunut neqeroorutaavoq. Tamannalu illersuutaalluni, nunap immikkoortaani Sermersuumi nakorsat pisortaat, Jesper Olesen oqarpoq.

Nunap immikkoortortaani Sermersuumi nakorsat pisortaat Jesper Olesenip innuttaasut peqqinnissaqarfiup akiuussusersuinerannik atuilluarnissaat innersuussutigaa. Assi © : KNR

Nammineq akiuussuserneqarnissamut akileerusuttut saniatigut suliffeqarfiit sulisumi nualluummut akiuussuserneqarnissaannik kissaateqartut aamma akiliussisinnaapput.

Nualluummut akiuussutissaq 100 koruuneqarpoq. Nuna tamakkerlugu akiuussusersuisoqassaaq - najukkamilu peqqissaavimmut imaluunniit napparsimmavimmut pingasunngornermi novembarip aqqaneq aappaanni nalunaaqutaq 13.00-ip 17.00-illu akornanni ornigutiinnartoqarsinnaalluni.

- Nammineq akiliiniaraanni aningaasanik nassataqarnissaq eqqaamaqquneqarpoq. Ornigutiinnarlunilu akiuussutissamik kapitikkiartortoqarsinnaavoq, Jesper Olesen oqarpoq.

Suliffeqarfimmit sulisut eqimattat kapitikkiartussappata suliffeqarfik Nunatsinni Nakorsaataasivimmut isumaqatigiissusiussaaq.

Innuttaasunut aarlerinaatilinniittunut suli periarfissaqartoq

Innuttaasunut aarlerinaatilinniittunut ilaalluni COVID-19-imut nualluummulluunniit akeqanngitsumik akiuussuserneqarnissaq angumerisimanngikkaanni tamanna suli novembarip aqqaneq-aappaanni  periarfissarineqassaaq.

Peqqinnissaqarfiullu tamanna atorneqarnissaa kaammattuutigaa.

- Nuallunneq navianarsinnaavoq. 65-it sinnerlugit ukioqaranni, imaluunniit, uummalluttuugaanni, pualluttuugaanni imaluunniit nappaammik allamik timip imminut illersorsinnaanerata sanngiinneranik nappaateqaraanni taava nuallunneq aarlerinarsinnaavoq, Jesper Olesen oqarpoq.

Innuttaasunut aarlerinaateqartunut ilaanerluni nalornissutigigaanni Peqqinnissaqarfiup nittartagaani imaluunniit Nakorsaaneqarfiup nittartagaani misissuisoqarsinnaavoq. Tassani akiuussuserneqarnissaq kissaatigigaanni qanoq iliortoqarsinnaanersoq atuarneqarsinnaavoq.