Ilulissani mittarfittaassaq naammassingajalerpoq
Ilulissani mittarfittaassap ammarnissaa ukiuni marlunni kinguartinneqaqattaarpoq.
Mittarfittaassaq Nuummisulli 2200 miiterinik takissuseqartussaq oktobarip 29-anni kiisami ammaanersiorneqassaaq, aqqusinermilu naapitatta mittarfittaarnissaq qilanaaraat.
- Uanga sunut tamanut ammaassaasussaammat qilanaareqaara, soorlu silarsuarmioqatitsinnut aatsaat taama qanitsigilissaagut, Hans Petersen oqarpoq.
Kunuk Fly Ilulissani taxartitsisuuvoq, mittarfittaassarlu ammarpat suliassaqarnerulernissani naatsorsuutigaa.
- Naatsorsuutigivara suu suliassaqarnerulaalernissaq, nangipporlu:
- Assorujuk pissanganarpoq mittarfittaarnissarput.
Mittarfittaassaq ammarpat Ilulissat Københavnillu akornganni pingasunngornerit tamaasa toqqaannartumik angalasoqartalissaaq. Air Greenland nittartakkamini taama paasissutissiivoq.
Eva Jonathansenip, Ilulissat pigisaanni Qeqertameersup, tamanna iluaqutaassasoraa.
- Aamma soorlu Kangerlussuaq atorunnaarmat Nuummukaqqaartarneq eqqarsarnartoqarluni. Inupparpassuit angallakkamik tassani, aamma nunaqarfiit eqqarsaatigalugit neriuppunga iluaqutaalerumaartoq arlaatigut.
Mittarfiup aallariartortarfittaa ammaanersiornermi aatsaat saqqummiunneqassaaq, Ilulissanilu mittarfimmi pisortap Ole Damgaardip ammaanersiornissaq aamma qilanaaraa.
- Mittarfiup illutaata silataatalu kusanarluinnartut takutinnissaannut qilanaarpugut immikkuullarissuuvormi. Illorsuummi iluani ingerlaarfissat ataqatigiissarluagaapput, taamaattumik ammaanersiornermi takutinnissaa qilanaaraarput.
Greenland Airportsip mittarfittaassaani inuit 70-it missaanniittut sulissapput, atorfiillu tamakkerlutik suli inuttalerneqanngikkaluartut, pisortaq isumalluarpoq.
- Suliffissat inuttassarsiukkagut, suli inuttalerneqanngitsut, massakkut arfineq-pingasut missaanniipput. Isumaqarpunga ajunngilluinnartumik ingerlasoq, inissarsiuussinerpulli ajornakusuulaarpoq, Ole Damgaard oqarpoq.
Oktobarimi ammaanersiornissamut piareersaatit naammassilersut teknikkinut suliniutinullu pisortap Christian Andersenip oqaatigaa, sulili suliassaqarnerarpaa.
- Ulapeqaagut, mittarfilli ammaanersiorneqarpat immikkoortortaqarfimmut suliffigisannut tamanna pingaartorujussuussaaq. Aamma anguniakkatta pingaarutillit ilaatut ukiut marluk ingerlaneranni mittarfiit pingajuannik ammarnersiorneqassammata. Illorsuup 99 procentia sinnerlugu naammassereerpoq qaammatillu ataatsip ingerlanerani suliassamerngit kingulliit naammassineqassapput.
