Atuarfik Inussuk: Ikuallattoornermi isumannaallisaaneq suli amigaataasoq

Kommuneqarfik Sermersuumi ulloq atualerfik aggustip 15-ianniuvoq, Atuarfik Inussuk siornali atulersimasussaagaluarpoq, ikuallattoornermili isumannaallisaaneq sulia migaataavoq, taamaammat init atuartunit tamakkiisumik qaqugu atulerneqarsinnaanissaat suli qularnarpoq.

Allattoq Irene Jeppson

juulip 23-at 2025 07:36

Naqqiut: Atuarfiup Inussuup allaaserineqarnerani Verkís Grønland ikuallattoqarnissaanut tunngasunut siunnersuisuusoq allappugut. Verkís Grønland kingorna uagutsinnut attaveqarput oqarlutillu siunnersuisuunatik.

Taamaattumik Kommuneqarfik Sermersuumut saaffiginnippugut paasiniarlugu kikkut ikuallattoqarnissaanut tunngasunut siunnersuisuunersut paaserusullutigit.

Nuummi atuarfik nutaaq – Atuarfik Inussuk – qaqugu ammassanersoq suli nalunarpoq. Ikuallattoornermi isumannaallisaanermi piumasaqaatit suli malinneqanngillat. Tamanna allagaatimi, atuarfiup sanaartorneqarneranik ikuallattoqarnissaanut teknikikkut naliliinermi KNR-ip pissarsiarisaani allassimavoq.

Suliniummi ikuallattoqarnissaanut siunnersuisoq, Verkís Grønland allakkamik uppernarsaammik pisariaqartumik suliaqarnissamut, matumani ikuallattoqarnermi periusissiamik aamma teknikikkut putsup siaruaanissaanik qimaanissamullu periusissanik siunnersuisuuvoq. Siunnersuinermilli suliffeqarfiup COWI-p misissuinerani atuarfiup ammarnissaanut tunngaviliisumik paasissutissat amigaateqangaatsiartut paasineqarpoq.

- Ikuallattoqarnissaanik siunnersuisut (Verkís Grønland aaqq.) tungaaniit pimoorussisumik peqqissaartumillu suliaqartoqarsimasoq, COWI isumaqarpoq.

Tamatumali saniatigut uppernarsaat ataatsimoortumik 'ersarinnanilu naammanngitsoq' COWI-p inerniliissutigaa.

Suliarineqarnera tunngaviusumik naammanngitsoq

COWI-p oqarnera naapertorlugu ikuallattoqaratarnissaanut inatsimmik malinninnermut uppernarsaateqarniarnermi ajornartorsiutit aallartereerput. Ikuallattoqarnerani teknikikkut pissutsit aaqqiissutillu suut qanorlu uppernarsarneqassanersut ersarinngilaq.

Taamatullu COWI-p teknikikkut aaqqiissutit toqqarneqartut arlallit – matumani ikuallattoqarnerani saagut atorneqartut, ikuallattoqarnerani timersortarfimmi silaannarissaatit, aamma qimaaffissiat igalaaminermik iigartallit atorneqarnerat ilanngullugu – illorsuarmi ikuallattoornermi sillimaniarnermut ajornerulersitsisinnaasut nalilerpaa.

Ikuallattoqarnissaanut teknikikkut uppernarsaaneq tamarmi aallaqqaataaniit suliarineqarnissaa COWI-p innersuussutigaa.

Aammattaaq COWI naapertorlugu oqartussat, sanaartortut siunnersuisullu paatsuuisoqaqqinnginnissaa kinguaattoortoqaqqinnginnissaalu pillugit qanimut oqaloqatigiittoqartariaqarput.

COWI-p uku misissorneqaqqinnissaat innersuussutigaa

Ikuallattoqarnissaanut periusissaq pillugu nalunaarusiaq nutaaq ersarissorlu tassani malittarisassanik nalinginnaasunik aaqqiissutit allatullu aaqqiissutit ersarissumik immikkoortinneqassapput.
Ikuallattoqarnissaanut silaannarissarfiit pissutsinut nalinginnaasunut issittumilu silap qanoq inneranut naleqquttunngortinneqassapput.
Qanoq iliornissamut teknikikkullu paasissutissanik naliliinermut tunngaviusumik annikitsortalersukkamik nassuiaanerit pillugit tunngaviusumik allagaat nutaaq.
Periusissiaq iliuusissallu akuerisat tunngavigalugit naatsorsuinermik nalunaarusiaq nutaaq.

Atuarfiup nutaap atorneqarsinnaalernissaanut ikuallattoornermi isumannaallisaanerup qaqugu piareernissaa suli ullulerneqanngilaq. Atuartut atuartitsiviit nutaat atorneqarsinnaalernissaata tungaanut atuarfitoqqani USK-imi ASK-imilu atuartinneqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.