Politiit Sermitsiami killilersuisut
Sermitsiami angallattoqannginnissaa eqqarsaatigalugu killilersorneqarpoq.
- Isumannaallisaaneq pissutigalugu Sermitsiami killilersukkami angallanneq juunip 29-anni 2026-mit septembarip 29-at 2026 tikillugu inerteqqutaavoq, Kalaallit Nunaanni Politiit tusagassiuutinut nalunaarummi allapput.
Politiit Sermitsiami 2025-mi ukiakkut timmisartumik nakkartoqarnera pissutaasoq paasissutissiissutigaat.
Timmisartup aseqqukuisa nakkaasinnaanerat suli aarlerinarnera, ajutoortoqartillugulu misissuisartut sumiiffimmi suli misissuinerat pillugu allapput.
Oqartussat sumiiffimmi nalunaaqutsersuipput.
Kalaallit Nunaanni Politiit isumannaallisaaneq eqqarsaatigalugu killilersukkap ataqqineqarnissaanik tamatta qinnuigaatigut.
Timmisartup Sermitsiamut nakkarnera
Canadamiit timmisartuaraq inummik ataatsimik ilaasulik Nuup eqqaani oktobarip 25-anni 2025-mi nakkarpoq.
Naviair, Arktisk Kommando Kalaallillu Nunaanni Politiit ujaasillutik timmisartuaraq Sermitsiamiittoq oktobarip 27-anni nassaaraat.
Nakkarfiusoq tikikkuminaattumiillunilu sivingammat annaassiniarneq misissuinerlu ajornakusoorsimapput.
Ilaasoq 45-nik ukioqartoq tuluullunilu Italiamioq ajutoornermi kingorna ajunaarpoq.
Oqartussat novembarip aallartinnerani aatsaat ajutoorfiusumukarsinnaasimapput toqusorlu qaqillugu ajutoortoqartillugulu misissuisartut ajutoorfiusimasoq teknikkikkut misissorpaat.
Timmisartuaraq qaqqamut 1 kilometerinik qutsissusilimmut aporpoq.
Nutaarsiassaqartitsivik Sermitsiaq naapertorlugu misissuisartut timmisartumik nakkarnerup sumik peqquteqavinneranik nalunaarusiaat inerniliussaallu suli utaqqineqarpoq.
Sumiiffimmi suli misissuisoqarnera aseqqukullu nakkaasinnaanerat pissutigalugit Sermitsiap nalaani angallattoqannginnissaa inerteqqutigineqarluni septembarip naanerata tungaanut killilersuisoqarpoq.
Unioqqutitsineq akiligassiissutigineqarsinnaavoq.
