Gazami isumaqatiginninniarnerit Trumpimit nersualaarneqartut: Hamas pingaarutilinnut akuersivoq

Gazami sakkuaakkunnaartoqarnissap isumaqatigiissutigineqangajalernissaa ilimanarsisoq Trumpip ataasinngornermi oqaatigaa. Isumaqatiginninniarnerit ingerlalluarput, taanna oqarpoq.

Allattoq Ann-Sophie Greve Møller

oktobarip 07-at 2025 06:35

Nutserisoq Tabetha Kreutzmann, Medea Olsen

Sorsuttartut Hamas pingaarutilinnut akuersimmata, Israelip Hamasillu akornanni isumaqatiginninniarnerit tungaatigut anneertuumik siuariaateqartoqarpoq.

USA-mi præsidenti, Donald Trump, Gazami sakkuaattoqarunnaarnissaa pillugu Egyptenimi isumaqatiginninniarnerit ingerlanneqarnerini, taama oqarpoq.

Isumaqatigiittoqarnissaanut piumasaqaateqarnersoq Det Hvide Husimi tusagassiortuniit aperineqarpoq, tassanilu Hamas-ikkut sakkutik tunniunnissaannut akuersissanersut apeqqutigineqarluni.

- Avaqqunneqarsinnanngitsunik piumasaqaateqarpunga (red lines aaqq.). Piumasaqaatit aalajangersimasut akuerineqanngippata taamaaliornavianngilagut.

- Isumaqarpungali isumaqatigiissutit ingerlalluartorujussuusut Hamas-ikkullu pingaarutilinnik akuersinikuupput, Trump oqarpoq.

Isumaqatiginninniarnerit Egyptenimi illoqarfimmi sulinngiffimmi angalasarfimmi Sharm el-Sheikhimi ingerlanneqarput.

Israelikkut aallartitaasa Hamasimiillu aallartitat saniatigut Amerikamiut aallartitaat aamma peqataapput.

Isumaqatigiinniarnerit ataasinngornermi naammassisimasut, Al-Qahera News marlunngornermi unnuap qeqqa qaangilaaraa allappoq.

Tusagassiivik Egyptenimi isertortumik paasiniaasartunut attaveqartoq allappoq isumalluartoqartoq.

Isumaqatiginninniarnerit marlunngornermi nanginneqassapput.

Isumalluartoq

Det Hvide Hus-iminngaanniit Trumpip eqqissinissamik isumaqatigiissuteqartoqarnissaa isumalluarfigaa.

- Isumaqatigiissuteqarnissarput ilimagaara. Ukiualuit isumaqatigiinniarnikuusut tamanna uannut oqaatigiuminaappoq.

- Gazamik isumaqatigiissuteqarfiginninnissarput qularinngilara.

Egyptenimi isumaqatigiinniarnerit Donald Trumpip saqqummiussaanik pilersaarutinik 20-nik immikkoortoqartut tunngavigalugit ingerlanneqarput.

Pilersaarummi siullermi Israelimiut Gazami suli tigusatut tigummineqartut iperagaanissaat Trumpip kissaatigaa. Soorluttaaq Palæstinami parnaarussat Israelimiittut iperagaallaqugai.

Sharm el-Sheikhimi isumaqatigiinniartut ataasinngornermi oqaloqatigiinnerminni siullertut tigusanik paarlaasseqatigiittoqarnissaa eqqartorpaat.

Det Hvide Husip tusagassiortunut oqaaseqartartua Karoline Leavitt siusinnerusukkut taama oqarpoq.

Gazami pissaanermik tigummiartut Hamasikkut, Trumpip pilersaarutaanut atatillugu tigusanik tamanik iperaanissamut piareersimallutik tallimanngormat nalunaarput.

Israelip ministeriunerata Benjamin Netanyahup, Israelikkut eqqissinissamut pilersaarutip immikkoortuata siulliup naammassinissaanut piareersimasut, ulloq taanna kingusinnerusukkut oqaatigaa.

/ritzau/AFP

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.