EU-mit nunatta avannaani kangiani aatsitassarsiornissamut aningaasaliisoqartoq

EU-p Amitsup eqqaani grafitimik aatsitassarsiorsinnaaneq 'pilersaarusiornermut pingaaruteqartoq' juunimi oqaatigaa.

Europakommissionip pilersaarusiorneq nutaaq 'REEsourcesEU'-mik taaguuteqartoq pingasunngormat akuersissutigaa.

Tamanna Mestersvigip kujataanut Malmbjergimut aningaasassaqarnerulernermik kinguneqartoq, naalakkersuisut tusagassiuutinut nalunaarummi paasissutissiissutigaat.

Greenland Resources Piiaffik, Malmvjergimi molybdæninik magnesiuminillu illersornissamut suliffissuaqarnermi ilaatigut atorneqartartunik piianissamut juunip 19-ianni akuersissuteqarfigineqarpoq.

Aatsitassanut inuussutissarsiornermullu naalakkersuisup, Naaja Nathanielsenip nuannaarnini tusagassiuutinut nalunaarummi oqaatigaa.

- EU-mi pisuussutinut periusissiaq nutaaq ilorraap tungaanut alloriarnerujussuuvoq. EU aatsitassarsiorfissanut siusinnerusukkut toqqaannartumik tapersiisinnaasimanngilaq, tamannalu aatsitassanik pissarsisinnaanerup siulliuniarfiginerani ingerlasumi aporfiusarsimavoq.

Aningaasat pisariaqartinneqartut

Tusagassiorfik Bloomberg naapertorlugu nunatta avannaani kangiani aatsitassarsiornissamut suliniummut aningaasat Europamiut aningaasaliisarfianeersuupput – qanorli aningaasartaqartiginera suli ilisimaneqanngilaq.

KNR-ip ilanngutassiaq Dansk Industrip aamma Sulisitsisut oqaaseqarfigisaat ullumi siusinnerusukkut saqqummiuppaa.

Aatsitassarsiorfinnik ammaaniarnermi aningaasarpassuarnik pissarsiniartoqartussaanera pissutigalugu ammaaniarnerup qanoq ajornakusoortiginera suliniaqatigiiffiit tamarmik oqaatigaat.

Dansk Industrimi geopolitikkimi pisortap, Peter Thagesenip EU-mit kalaallit aatsitassarsiornissamut suliniutaannut – soorlu Malmbjergimi molybdæninik piiaavimmut aningaasaleeqataanissaat kissaatigalugu ilanngutassiami oqaatigaa.

Naalakkersuisoq ullumi tusagassiuutinut nalunaaruteqarnermini assingusumik oqaaseqarpoq.

- Niuernikkut aningaasassarsiniartarneq tatisimaneqarpoq, aammalu aatsitassarsiorluni suliassarpassuit aallartinnissaminnut pisortanit tapersiivigineqarnissamik imaluunniit tapersersorneqarnissamik pisariaqartitsipput. Taamaattumik maannakkut toqqaannartumik aningaasaliisoqarsinnaalernera, aammalu Kalaallit Nunaanni suliassap tigusisussat akornanniinnerat, nutaarsiassaavoq tusarluarnartorujussuaq, Naaja Nathanielsen oqarpoq.

Suli suliassarpassuaqartoq

Aatsitassarsiornermilli suliniutip aallartinnissaanut Greenland Resources pappiararpassuarnik suli suliassaqarpoq.

Tassa VVM-imut VSB-mullu nassuiaatit akuersissutigineqaqqaassapput, aamma suleqatigiit pingasut tassa Naalakkersuisut, Kommuneqarfik Sermersuup ingerlatseqatigiiffiullu akornanni isumaqatigiissuteqartoqassaaq kiisalu aatsitassarsiorfimmik matusinissamut pilersaarut akuersissutigineqaqqaassalluni.

Nassuiaatit aappaagu tusarniaassutigineqarnissaat naatsorsuutigineqartoq Naalakkersuisut paasissutissiissutigaat.