Enoksenip siunnersuutaanik isumaqataanngitsut

Namminersorlutik Oqartussat suliffeqarfiutaanni nunaqavissuinnarnik siulersuisoqalernissaa, Partii Naleqqap siulittaasuata Hans Enoksenip anguniarlugu, tallimanngornermi nalunaarutigaa.

Tamannali isumatusaarnerunngitsoq, partiit assigiinngitsut isumaqarput.

Naalakkersuisuutitaqartut Inuit Ataqatigiit naapertorlugit Kalaallit Nunaannik innarliisinnaavoq.

AAMMA ATUARUK Inuussutissarsiutinik ingerlataqartut atugarissaarneq qulakkiissavaat

- Imminut mattutissanngilagut, ilisimasat avataaneersut atorfissaqartippagut. Suliffeqarfiutitta nunat tamalaat akornanni ingerlalluarnissaat pillugu ilisimasanik aamma katersinissarput avataaniillu pinissarput qunugissanngilarput. Taamaammat Partii Naleqqap saqqummiussaa isumaqatiginngilara, Inuit Ataqatigiinni siulittaasoq Sara Olsvig oqarpoq, erseqqissaatigaalu nunatsinni siulersuisut 60 procentii nunaqavissuusut.

Sulianik kivitsisinnaasuusariaqartut

Demokraatit Hans Enoksenip siunnersuutaanik aamma isumaqataanngillat.

Illuatungiliuttut siulittaasuata Randi V. Evaldsenip piginnaasalinnik inuttalersuinissaq pingaarnerutinneqartariaqarsoraa.  

- Naalakkersuisut suliassaasa pingaarnersaasa ilagaat sulianik kivitsisinnaasunik inuttalersuinissaq. Taava apeqqutaanngilaq suminngaanniit aallaaviunersoq, uagutsinnut pingaarluinnarpoq oqaatigissallugu siulersuisut tamakkerlutik piginnaasaqarluarnissaat siunertaasariaqartoq ilisimasaqarluarnissaallu aamma assigiinngitsunillu suliaqartuunissaat pingaarluinnarpoq, Randi Vestergaard Evaldsen oqarpoq. 

Aningaasaliiumajunnaartoqarsinnaasoq

Suleqatigiissitsisut siunnersuut aamma isornartoqartippaat. Tamannami piviusunngussappat aningaasaliisinnaasut aningaasaliiumajunnaarnerannik kinguneqarsinnaasoq, Tillie Martinussen isumaqarpoq.

AAMMA ATUARUK Nunaqavissuinnaat siulersuisuniissapput

- Kalaallit Nunaannut aningaasaliiumajunnaartoqarsinnaanera aarleqqutigisinnaavarput nunattalu avataanit aningaasaliisut pisariaqarteqaagut, suleqatigiissitsisuneersoq Tillie Martinussen oqarpoq.

Hans Enoksenip siunnersuutaa piviusunngussappat suliffeqarfinni soorlu Royal Greenlandimi Tele-Postimilu nunaqavissuinnarnik siulersuisoqalernissaa, Inatsisartunut qinersereernerup kingorna piaarnerpaamik pissaaq.

AAMMA ATUARUK Samarbejdspartiet vil hilse tilkaldt arbejdskraft velkommen