Bankiviup naatsorsuutini qaffappai: Amerlanerit ileqqaartalerput
Ukiup affaani siullermi Bankivik siuariaateqarsimavoq.
Aningaaserivik tusagassiuutinut nalunaarummi taama allappoq. Nunatsinni immikkoortortaqarfik akileraarutit suli ilanngaatiginagit 23 millionit koruuninik sinneqartooruteqarsimasoq, tassani eqqaaneqarpoq.
Suliffeqarfik tamarmi akileraarutit suli ilanngaatiginagit 190 millionit koruuninik sinneqartooruteqarpoq, siuariartornerlu ilimagisamit pitsaanerusoq, pisortaanerup Turið F. Argep oqaatigaa.
- Ukiup affaani siullermi ingerlatseqatigiiffiup ingerlarnga naatsorsuutigisimasatsinnit pitsaaneruvoq, taamaasilluta ukiup affaani naatsorsuutit inerneri pitsaasut saqqummiussinnaavagut, taanna oqarpoq.
Amerlanerit ileqqaagaqartut
Qaammatit arfinillit siulliit ingerlaneranni realkredit-imik taarsigassarsiat aamma aningaasat uninngatitat annertuseriarsimasut, aningaaseriviup maluginiarpaa.
Pisortaaneq naapertorlugu tamanna sullitat aningaasaqarnikkut ingerlalluarnerinik taarsigassarsiaminnillu akilersuisinnaanerannik ersiutaavoq, tamannalu pissutaalluni aamma aningaasaqarnikkut annaasaqarsimanermik imatorsuaq eqqaasassaqanngitsoq erseqqissarpaa.
- Ataatsimut isigalugu sullitatta aningaasaqarnikkut ingerlalluarnerat taarsigassarsiaminnillu akilersuisinnaanerat nuannaarutigaarput, pisortaaneq oqarpoq.
Aammattaaq atuisut amerlasuut erniat appariartoraluartut aningaasaatiminnik ileqqaagaqarput.
Tusagassiuutinut nalunaarut naapertorlugu ukiup siulianut sanilliullugu ileqqaagaqarneq 15 procentimik qaffariarsimavoq.
Naatsorsuutit qaffanneqartut
2024-mut naatsorsuutit saqqummiunneqarmata 2025-mi akileraarutit ilanngaatigereerlugit 210-240 millionit koruunit akornanni sinneqartooruteqarnissaq naatsorsuutigineqartoq, Bankivimmit oqaatigineqarpoq.
Ukiulli affaata kingulliup ingerlanerani naatsorsuutit taakku maanna qaffasinnerupput.
Akileraarutit ilanngaatigereerlugit ukiumut 235 millionit koruunit 265 millionillu koruunit akornanni sinneqartooruteqarnissaq aqutsisut missingerpaat.
