Danmarkip Kalaallit Nunaata Savalimmiullu erfalasutik atorlugit OL-imut peqataatikkusukkai

Nunarput Olympiademi ilisaritinneqarnissaminut qaninnerulerpoq. 

Folketingip qullersaata, siulittaasoqarfiup, Kalaallit Nunaata Savalimmiullu pisinnaatitaaffitsik erfalasutillu atorlugit peqataasinnaanissaat pillugu Nunat Tamalaat OL-imut ataatsimiititaliaa, IOC, qinnuigaa. 

Folketingip Siulittaasoqarfiata tusagassiuutinut nalunaarutaani tamanna allaqqavoq. 

- Nunat nukittuunik namminersorsinnaasunillu timersortartullit pineqarput, Folketingip siulittaasua Søren Gade taama oqarpoq. 

- Siulittaasoqarfik Savalimmiuniit Kalaallit Nunaanniillu timersortartunut, nunat tamalaat unammiffigisartagaanni annerpaami erfalasortik atorlugu peqataanissamik pingaartitsisunut tapersersuerusuppoq.

Savalimmiuni ajornartoorneq

Kalaallit Nunaata Savalimmiullu ‘IOC-mi ilaasortanngornissaat’ naalakkersuisunit suliniutigineqassasoq naalakkersuisoqatigiinngortut toqqammavianni allaassimavoq.

Folketingimut ilaasortap Naaja H. Nathanielsenip (IA) Kalaallit Nunaat Savalimmiullu nunanut allanut tunngasuni pisinnaatitaanerunissaminnik danskit naalakkersuisutisa isumaqatigiinniarneranni sukataarutiginnittarsimanerat KNR-imut oqaatigaa.

Taassumallu oqarnera naapertorlugu, taamatut anguniagaqarnermi naalakkersuisut nunat taakkua IOC-imut ilanngunneqarnissaannut suliniuteqarnissaat anguneqarpoq. 

- Tamanna kalaallit kinaassusaannik akuerinninneruvoq pingaaruteqartoq nammineerlutalu sassarsinnaatitaanngornissatsinnut takussutissaalluni, Naaja H. Nathanielsen allakkatigut akivoq:

- Siulittaasoqarfiup suliami matumani tapersiinerat, naalakkersuisullu toqqammavimminni ingerlatitseqqiinissaminnik akuerinninnerat, Inuit Ataqatigiinnit isumalluarfigeqaarput.

Danskit nunanut allanut ministeriata, Lars Løkke Rasmussenip (Moderaterne), Savalimmiut assammik arsarluni unamminermi ingerlalluartarnerat ‘naalagaaffeqatigiinnermi ataqatigiinnermut ajornartorsiutaangaatsialersinnaanera’ Politikenimit apersorneqarnermini oqaluttuaraa. 

Allaallumi Klakvikimi 1955-imi akerleriissut, Savalimmiuni innuttaasut Danmarkimut pikitsitsinerannik kinguneqartoq eqqissiviilliortitsinerillu unitsinniarlugit danskit politiivinik 120-nik Savalimmiuliartitsinermik kinguneqartoq tassunga assersuusiaraa:

- Nuna taanna OL-imut peqataasinnaanngoriataartuuppat IOC-lli inuiannik nassuiaanera pissutigalugu ilaasinnaanani, Klaksvikimi akerleriinneq oqaluttuarisaanermilu misigisagut tamarmik suunnginnerujussuanngussapput, Lars Løkke Rasmussen oqarpoq. 

Ilanngunnissaannut piffissaq sivisussasoq

Ritzau-ip allaaserisaa naapertorlugu IOC-p malittarisassat sukannersut tassa nunat Naalagaaffiit Peqatigiinni ilaasortat namminersortut kisimik olympiademi ataatsimiititaliaqarlutik ilaasortanngorsinnaanerat 1996-imili malippai.

Taamaattumik Nunatta OL-imi ilisaritinneqarnissaanut piffissaq sivisusinnaavoq. 

- Olympiademut peqataasalernissamut akuerineqarnissaq ajornaatsuinnaanngilaq. Taamaappoq. Naalagaaffiup Danmarkitut ittup tamanna ajornannginnerulersissinnaanngilaa, Danmarkimi Timersoqatigiit Kattuffiani pisortaq Hans Natorp Politikenimut taama oqarpoq. 

Kalaallit savalimmiormiullu timersortartut Danmarkimi Timersoqatigiit Kattuffiata ataanniipput OL-imullu peqataasinnaanissamut danskit timersortartui unammisarpaat.  

Folketingilli Siulittaasoqarfiata Kalaallit Savalimmiormiullu timersornikkut piginnaasaqarnerarpaat:

- Nunat taakku marluk nunat tamalaat akornanni qaffasissumik unammillersinnaassuseqarnertik takutereerpaat, soorlu ass. Savalimmiormiut 2026-mi EM-imi assammik arsarnermikkut kalaallillu timersortartut 2026-mi Ukiaanerani OL-eqataanermikkut, siulittaasoqarfik tusagassiuutinut nalunaarumminni allappoq. 

Tulliani Aasaanerani OL 2028-mi Los Angelesimi USA-mi ingerlanneqassaaq.