Danmarkimi qinigaaffissat ilaasortallu nutaat ataatsimiinnerup ulluisa siullianni sammineqartut

Inatsisartut upernaakkut ataatsimiinnerat marlunngornermi aallartinneqarmat pisarnertut oqallikkusuttoqarluinnarpoq.

Pingaartumik Siumumit Erik Jensenip partiimi naalakkersuisunit qaammatip siuliani tunuarneranut tunngavilersuuteqarnerani.

- Ilaasortassanik Danmarkimut suliffissarsiortunik innersuussuteqartoqarnera eqqumiilaarpoq, taanna oqaaseqartarfimmit unnerluutiginnittumik oqarpoq.

Tamatuma kingorna paarlakaattumik pasilliinerit aallartipput, Anna Wangenheimillu (D) Folketingimut qinigassanngortissimasup peqqissutsimut inunnullu innarluutilinnut naalakkersuisutut atuuffini akisussaassuseqarluinnarluni isumagisimasani isumagissallugu nassuiaatigaa.

Naleraq Siumullu naalakkersuisunut ilaasortanik nutaanik inatsisartulluunniit siulittaasuannik taaseqataanngillat, partiit taakku tamarmik taamaammat taaseqataanngillat. Assi © : Pipaluk Høegh / KNR

Siumumi ilaasortaasimasup, Vivian Motzfeldtip ataatsimiinnermi torersumik oqallittoqarnissaa piumasaraa.

- Inuiaqatigiit taamaannissaq piumasaraat, taanna ataatsimiittarfimmit oqarpoq.

Ilaasortat nutaat

Naalakkersuisunut ilaasortat nutaat sisamat upernaakkut ataatsimiinnermi ullormi siullermi akuerineqartussaapput.

Mariane Paviasen Jensen (IA), Jørgen Rosbach (D), Iddimanngiiu Bianco (IA) aamma Maritha Broberg (A) naalakkersuisunut ilaasortatut nutaatut akuersissutigineqarnissaanni akerliusoqarani 18-it akuersipput.

Tamatuma saniatigut Kim Kielsen Inatsisartut siulittaasuatut ingerlaqqippoq.

Naleraq Siumullu siulittaasumik aamma naalakkersuisunut ilaasortanik nutaanik taasinermi taaseqataanngillat.

Maritha Broberg (A) naalakkersuisut nutaat marlunngornermi saqqummiunneqartut ilagaat. Taanna Isumaginninnermut, Suliffeqarnermut Ilaqutariinnut Nunamullu Namminermut Naalakkersuisunngorpoq. Assi © : Sikkersoq Rosing Karlsen / KNR

Naalakkersuisunulli ilaasortat oqartussaaffiini nalinginnaasumit nikisitertoqarneruvoq.

Assersuutigalugu Múte B. Egedep Vivian Motzfeldt attaviitsunngorsimasoq taarserlugu nunanut allanut naalakkersuisunngorlunilu Naaja Nathanielsenip Folketingimut ilaasortanngortup naalakkersuisuuffigisai inuussutissarsiorneq aamma aatsitassat aamma naalakkersuisunngorfigai.

Kingulliullugu taaneqartoq folketingimut ilaasortat nutaat inatsisit tunngaviusut atsiormatigit akuerineqarluni Folketingimiissinnaalerpoq.

- Ulloq uannut angisuujusoq qularutissaanngilaq. Inatsisartut eqqarsaatinniipput, ingerlalluarnissaannik kissaallugillu suliaqarnerisa malinnaaffiginissaat qilanaaraara, Naaja H. Nathanielsen KNR-imut oqarpoq.

Aatsitassat

Inatsisartuni oqaluuserineqartoq siulleq aatsitassanut politikkimut tunngassuteqarpoq. 

Múte B. Egede Vivian Motzfeldtip suliaanik tassa atorfillit USA-mi suleqatigiissitaanik suliaqarneranik nangitsisussaarpasissoq nunanut allanut naalakkersuisunngorpoq. Assi © : Sikkersoq Rosing Karlsen / KNR

Aatsitassanut naalakkersuisunngortup, Múte B. Egedep (IA) sulianik Aatsitassanut Aqutsisoqarfimmi aamma Avatangiisinut Aqutsisoqarfimmi immikkut suliaqartoqartarunnaarsitsilluni suliamilli aqutsisoqarfimmit sorlermit misissuisoqarsinnaanissaanut aalaakkaanerusumik toqqaasoqarsinnaalersitsinissamut inatsisissatut siunnersuut saqqummiuppaa.

- Orsugiak pillugu suliamik nutaamik massakkut sammisaqarpugut, Naleqqamit Juno Berthelsen naalakkersuisut aqutsisoqarfimmik toqqaanissamut pissaaneqarnerulersinneqarpata nunani allamiut suliffeqarfiutaasa nunatsinni aatsitassat iluanaaruteqarfiginerulersinnaanissaat pillugu oqarpoq.

Múte B. Egedep tamanna nunatta aatsitassaataanik nunanut allanut tunniussinerunani allaffissornikkut suliarinninnermik eqaannerulersitsinissamut kiisalu nunat allat susassaqarfimmut tassunga atatillugu suleqatiginerannik ajornaannerulersitsinissamut tunngassuteqarnerarpaa.

Inatsisissatut siunnersuut aappassaaneerneqartoq 16-init akuerineqarluni arfineq-pingasunillu akerlerineqarluni pingajussaaneerneqartussanngortinneqarpoq. Siunnersuut apriilip 21-anni pingajussaaneerneqassaaq.

Ukiakkut ataatsimiinneq

Inatsisartut siulittaasuata, Kim Kielsenip ukiakkut ataatsimiinnerup qaqugu aallartinneqarnissaanut siunnersuuteqarneranik upernaakkut ataatsimiinnermi ulloq siulleq naammassineqarpoq.

Ukiakkut ataatsimiinneq septembarip aqqarnanni aallartittussatut siunnersuutigineqaraluarpoq, siulittaasulli Naleqqap isornartorsiuinerata kingunerisaanik ullormik aalajangiinissaq ataatsimiinnermut kingusinnerusumut kinguartippaa.

Inatsisartuni aqagu ataatsimiittoqaqqissaaq, tassanilu ilinniartitaanermut, kultureqarnermut, timersornermut ilageeqarnermullu naalakkersuisoq, Nivi Olsen (D) apeqqarissaarfigineqassaaq.