Qamutit SAR Islandimiut ICE-SAR-iat suleqatigiinnissamik isumaqatigiissuteqarfigigaat

Kajumissutsiminnik annaassiniartartut Qamutit SAR-ip Islandimiut annaassiniarnermik suliniaqatigiiffiat, ICE-SAR suleqatigiinnissamik isumaqatigiissuteqarfigaa.

Tamanna eqimattat ujaasinermik annaassiniarnermillu suliaqarnermik upalungaarsimanerannut pitsanngorsaataassaaq.

Qamutit SAR tusagassiuutinut nalunaarummi allappoq.

- Isumaqatigiissut Kalaallit Nunaanni annaassiniarnermik suliaqarnermi ilinniartitaanikkut, sungiusarnikkut, ilisimasanik avitseqatigiinnikkut aammalu annaassiniarnermi piginnaasanik ineriartortitsinikkut suleqatigiinnerup annertusarneqarnissaanut tunngaviliissaaq, tusagassiuutinut nalunaarummi allassimavoq.

Kajumissutsiminnik SAR-imik suliaqartut akornanni isumaqatigiissut Reykjavikimi annaassiniarneq pillugu ataatsimeersuarnermi Björgunimi oktobarip 17-ianni atsiorneqarpoq.

Upalungaarsimaneq nukittunerusoq

Qamutit SAR ICE-SAR-ip ‘annaassiniarnermik aaqqissuussinermi, ilinniartitaanermi aammalu annaassiniarnermik ingerlatsinermi aqutsinikkut misilittagarpassui iluaqutigisinnaalernissaanut’ qilanaarpoq.

Kajumissutsiminnik annaassiniartartut suleqatigiinneq nutaaq annaassiniarnermik suliaqarnermut aamma nukittorsaataassasoq allappoq.

- Qamutit SAR-imut suleqatigiinnissamut siunertaqarnermik nalunaarut najukkami aamma nuna tamakkerlugu kajumissutsiminnik annaassiniarnissamut upalungaarsimanerup nukittunerusumik piginnaasaqarfiunerusumillu ineriartortinneqarnissaanut alloriarneruvoq pingaarutilik, taakku allapput:

- Kalaallit Nunaata nunataa, silaa aamma sumiiffiinnit sumiiffinnut ungasittorujussuusinnaaneri  annaassiniarnermi immikkut piumasaqaateqarfiupput. Taamaattumik kajumissutsiminnik annaassiniartartut naleqquttumik ilinniartinneqarsinnaanissaat, sungiusarsinnaanissaat aamma suliamikkut ineriartorsinnaanissaat pingaaruteqarluinnarpoq.

Qamutit SAR Nuummi angerlarsimaffeqarpoq, sumiiffimmilu annaassiniarnermik suliaqarnermi ilaatigut ikiuuttarluni, sinerissamili sumiiffinni assigiinngitsuni annaassiniarnermi aaqqissuussaasumik peqanngilaq.

Issittumi Sakkutooqarfimmi aqutsisup, Søren Andersenip sinerissami kajumissutsiminnik suliaqartut annaassiniarnermi suliaqarnermi iluaqutaassasut erseqqissaatigaa.

Qamutit SAR-ip ICE-SAR-imut suleqatigiinnissamik isumaqatigiissut nutaaq tunngavigalugu nuna tamakkerlugu kajumissutsiminnik annaassiniartarneq nukittorsaavigineqarsinnaassasoq neriuutigaa.

- Atsioqatigiinnermikkut Qamutit SAR aamma ICE-SAR suleqatigiillualertoqarnissaanut alloriarneq pingaarutilik angusimavaat, tassani misilittakkat ataatsimoorussat, suliamut tunngasunik ilisimasaqarneq aamma kajumissutsimik peqataaneq Kalaallit Nunaanni isumannaallisaanermut annaassiniarnissamullu upalungaarsimanerup nukittorsarneqarnissaanut iluaqutaasinnaallutik.