Nunatsinni mittarfiup nunanit tamalaanit tikinneqarsinnaasup ammarnissaa akuersissutigineqartoq
Akuersissut kingulleq tunniunneqarpoq, Københavnimiillu nunatta kitaani Qeqertarsuup Tunuani illoqarfimmut Ilulissanut toqqaannartumik siunissami timmisartuussisoqartalissaaq.
Angallannermut Aqutsisoqarfiup Ilulissani mittarfissap nutaap isumannaallisaanikkut naammaginartuunera sisamanngornerup unnuaani akueraa, mittarfillu sisamanngornermi pisortatigoortumik ammarneqassaaq.
Lars Korsholm, angallannermut aqutsisoqarfimmi pisortap tullia, Ritzauimut tusagassiuutinut nalunaarummi taama oqarpoq.
- Misissueqqissaareerluta misileraallutalu timmisartoreerluta mittarfik isumannaallisaanikkut piumasaqaatinik, mittarfinnut nutaaliaasunut nunanit tamalaanit atorneqartartunut piumasaqaataasut assigalugit, eqquutsitsisutut akueraarput, Lars Korsholm oqarpoq.
Akuersissulli arlalinnik, aallartinnermi killilersuinertalinnik ilaatigut piumasaqaatitaqarpoq. Killilersuinerit mittarfiup ingerlatsinermut misilittagaqarnerujartornerani sakkukinneruleriartuaarsinneqarumaarput.
- Timmisartuussinernut pilersaarutaasunut sunniuteqarnavianngilaq, timmisartuussinerimmi takornariarfiunngitsumi killeqareerput, Lars Korsholm oqarpoq.
Pisussaq pingaarutilik
Akuersissut piareermat Ilulissat Københavnimit, Europamit nunarsuarmilu sumiiffinnit allanit timmisartunit anginerusunit toqqaannartumik tikiffissanngorpoq.
Tamanna aningaasaqarnermut ministerip Peter Hummelgaardip (Socialdemokratiet) nuannaarutigaa.
- Ilulissani mittarfiup ullumikkut ammarneqarnera Kalaallit Nunaannut naalagaaffeqatigiinnermullu pingaaruteqaqaaq. Nuummut Ilulissanullu toqqaannartumik timmisartuussisoqartalerpat nunat tamalaaneersut Kalaallit Nunaannut Kalaallit Nunaanniillu angalasinnaanerat nukittorsarneqassaaq, taamaalillunilu inuit naapinnissaannut periarfissat aamma pitsanngorsarneqarlutik, taanna allakkatigut oqaaseqaammini oqarpoq.
Mittarfitoqaq 845 meterinik takissuseqarami timmisartunit anginerusunit miffigineqarsinnaasanngilaq, timmisartulli anginerit mittarfimmut nutaamut 2200 meterinik takitigisumut maanna missinnaanngorput.
Københavnimiit Ilulissanut timmisartorluni siornatigut angalaniaraanni, illoqarfiit pingaarnersaat Nuuk aqqusaaqqaarlugu timmisartortoqartarpoq.
Timmisartuussineq toqqaannartoq ataaseq
Mittarfik nutaaq sisamanngornermi ammarneqareerpat, Ilulissat Københavnillu akornanni toqqaannartumik pingasunngornerit tamaasa timmisartuussisoqartassaaq. Sapaatilli akunnerali ataatsip ingerlanerani timmisartuussisarnerit nalliuttorsiorfiit nalaanni - ilaatigut juulli ukiutoqqallu akornanni, akulikinnerulissapput.
Københavnimiit Ilulissanut timmisartuussisalerpat sisamanngornermi timmisartuussisoqassaaq.
Timmisartoq Air Greenlandimeersoq pilersaarutit malillugit Ilulissani nalunaaqutaq 11.40 - danskit nalunaaqutaat malillugu nalunaaqutaq 14.40, missaaq.
Ilulissani mittarfiup allanngortiterneqarnera, Kalaallit Nunaanni sanaartornerit milliardilikkuutaanik nalillit ilagaat, tassanilu Ilulissani mittarfiup saniatigut Nuummi Kujataanilu Qaqortup eqqaani mittarfiliortoqarpoq.
Mittarfiit nutaat Kalaallit Nunaanni attaveqaasersuutinut nukittorsaataassapput aningaasaqarnikkullu ineriartortitsillutik, ilaatigut takornariaqarnerulernikkut.
Nuummi Ilulissanilu mittarfiit tallineqarnissaat Kalaallit Nunaanni piffissami nutaanerusumi attaveqarnermut suliniutit annersaasa ilagaat.
RITZAU
