Borgmesteri Ittoqqortoormiini mittarfiliortoqarnissaanik nalunaaruteqartoq

Kommuneqarfik Sermersooq Ittoqqortoormiini mittarfissamut pilersaarutinut tunngatillugu paasissutissiissuteqalaarpoq. 

Naalakkersuisut Danmark siorna isumaqatigiissuteqarfigaat, tassa Ittoqqortoormiini mittarfissaq Danmarkimit akilerneqassasoq isumaqatigiissutigineqarluni. 

Politikerit mittarfissaq sooq qanorlu isumaqatigiissutigineqarsimanersoq taamanili oqaaseqarfigerusussimanngilaat. 

Kommuneqarfik Sermersuup tusagassiuutinut nalunaarutaanni, mittarfik Nerlerit Inaannik piffissap ingerlanerani taarsiisussaq pineqarpoq. 

- Mittarfik pillugu isumaqatigiissuteqartoqareernera erseqqissassallugu pingaaruteqarpoq. Naalakkersuisunit piviusunngortitsinissaq sulissutigineqarpoq naak aalajangersimasumik suli piffissalerneqanngikkaluartoq. borgmesteri Avaaraq Olsen (IA) allappoq.

Illersornissaq pillugu USA-p isumaqatigiissuteqarfiginera

Borgmesterip Avaaraq Olsenip tusagassiuutinut nalunaarummi mittarfiliortoqarnissaanut isumaqatigiissuteqarnikkut illersornissamullu USA-p isumaqatigiissuteqarfigineratigut Ittoqqortoormiini suliaqartoqassangatillugu allappoq. 

- Sillimaniarneq illersornissarlu pillugit isumaqatigiissut nutaaq peqatigalugu tamanna isumaqassaaq Kalaallit Nunaanni immikkoortumi tassani ukiuni tulliuttuni malunniutilimmik suliaqartoqassasoq naatsorsuutigissagipput, Avaaraq Olsen oqarpoq.  

USA-p isumaqatigiissuteqarfigineranit, Amerikamiut Mestersvigimi sakkutooqarfiliorsinnaatitaalissapput. Tamanna qanoq kinguneqarumaarnersoq suli ilisimaneqanngilaq, tamanna USA-mit, nunatsinnit Danmarkimiillu oqaloqatigiissutigineqaqqaassammat.

Ineqarnermut, attaveqaasersuutinut, isorliunerusunut upalungaarsimanermullu naalakkersuisoq Iddimanngiiu Jensen Bianco qaammatip affaa siulleq Tunumiippoq. Tassani ilaatigut attaveqaasersuutit pillugit innuttaasunik ataatsimiisitsilluni.  Assi © : Markus Valentin / KNR

Pitsaanerusumik attaveqaasersuuteqartariaqartoq

Mestersvig Kommuneqarfik Sermersuumiinngilaq, Nunamulli allanngutsaaliukkamut, naalakkersuisut akisussaaffigisaannut, ilaavoq. 

Illersornissamulli isumaqatigiissutip Ittoqqortoormiini nutaamik attaveqaasersuuteqartoqartariaqarnera naqissuserpaa, borgmesteri allappoq. 

- Immikkoortumi suliaqarnerulertoqarpat assigiinngitsutigut Ittoqqortoormiini malugineqarsinnaanissaa aaamma naatsorsuutigaarput. Minnerunngitsumik ullutsinnut naleqquttumik patajaatsumillu attaveqaasersuutinik pisariaqartitsinermut atuuppoq, borgmesteri Avaaraq Olsen oqarpoq.

- Tunup avannaani suliaqarneruneq najukkami inuiaqatigiinnut iluaqutaasinnaasumik attaveqaasersuutinik pitsaanerulersitseqataasinnaappat periarfissaqalersitsisinnaallunilu Ittoqqortoormiinut pitsaasuussaaq Avaaraq Olsen oqarpoq.

Naalakkersuisoq Tunumi

Ineqarnermut, attaveqaasersuutinut, isorliunerusunut upalungaarsimanermullu naalakkersuisoq Iddimanngiiu Jensen Bianco (IA) qaammatip affaa siulleq Tunumiippoq.

Naalakkersuisoq tusagassiuutinut nalunaarummi tamanna pillugu allappoq. 

- Illoqarfiup attaveqaasersuutaanut maannakkut ilungersunartorsiorfiit siunissamilu aaqqiissutissaasinnaasut pillugit ineriartortitsisumik oqaloqatigiinnitsinnut qujaqaanga.  

- Atortut, ineqarnerup, kiffartuussinissamut isumaqatigiissutit, mittarfiit, attaveqaatitigut attaveqatigiinnerup, umiarsualiveqarnerup upalungaarsimanerullu iluanni pingaarutilinnik eqqartuivugut. 

Iddimanngiiu Jensen Bianco Tunu, innuttaasut attaveqaasersuutillu salliutillugit nangilluni allappoq. 

-Tikeraarnitsinnit ataatsimiinnitsinnillu pissarsiarisimasakka atorfilittamalu pissarsiarisimasaat ingerlateqqissallugit qilanaarpunga. Suliamik uuminnga malitseqartitsinissannut Tunumaqqinnissara neriuutigaara.