Atuarfiup matugallarneqarnera ilinniartitsisunik ulapisitsisoq
Atuarfik Ukaliusami oqummik nassaartoqareersorlu atuarfik ullormiit ullormut matugallarneqarpoq. Tamannalu ilinniartitsisunut atuartunullu sunniuteqarnerluppoq.
- Eqqarsariallannartorujussuuvoq, aappaatigut aamma annakkuummernermik ersersitsisoqarpoq. Sulisut arlallit misigisimapput kiisami tusarneqarpugut, Atuarfik Ukaliusami nukarlerni pisortap tullersortaa Inger Reimer Andersen oqarpoq.
Ilinniartitsisut atuartullu oquttumiikkunnaarnerat angajoqqaanit aamma nuannaarutigineqarpoq.
- Intrakkut allagarsingatta matusoq pissittaanngiluaannangajappungaluunniit qutsatingaarakkit kiisami tusaaneqartutut misigaluta, USK-imi atuartuutilik Erna Rasmussen oqarpoq.
Atuarfiup Inussuup suli atulerneqannginnera pissutaalluni atuartut sulisullu 600-t missaanniittut avissaartillugit inissinneqarallassapput. Tassanilu atuartut angajulliit eqqugaanerpaasut angajullerni pisortap tullersortaa Margrethe Karlsen Brummerstedt KNR-imut oqarpoq.
Atuartut angajulliit USK-ip matugallarneqareernerta kingorna ulluni sisamani atuanngiffeqartinneqarput. Atuarfik Hans Lyngelli miniklubbenianut tassa atuareernerup kingorna ornittagaannut angajulliit 250-it aggulullutik atuarfissaat maanna aaqqissuunneqarput.
- Aallaqqaammut avinneqarallarput, tassa atuartut 8.klassit siulliuteriarlugit ullaap tungaaniit ullup qeqqata tungaanut, 9. klasserlu ataaseq. Taava ullup qeqqata kingorna 9 klassit sinnerit 10. klassillu atuartinneqartassapput, taanna oqarpoq.
Atuartut nukarliit inissarsiaarneqartut
Atuarfik Ukaliusami atuartut nukarliit 3. klassi tikillugu piaartumik sumiiffigigallagassaannik nassaartoqarpoq tamannali aamma ulapaarfiuvoq.
- Uangaalluni viceriulluni pisassaninnartorujussuuvoq. Kangillinnguit Atuarfiani 1. klassit første årgangit tassa atuartut 100-t sinnillit Kangillinnguit Atuarfiata atuareernerup kingorna ornittangaani Qajaasamiittussapput. Taavalu 2. årgangit assingiinngitsunut aggulutaapput. Nuussuup atuarfiani atuareernerup kingorna ornittakkami Neriusaami Inneruulanilu. Taavalu 3 årgangit klassit marluk Nuussuup atuarfittaaniiittussaallutik, Inger Reimer Andersen oqarpoq.
Sumiiffissaqarpiannginneq pissutigalugu avissaaqqasariaqarneq tamanit malugineqassasoq tullersortinit ilimagineqarpoq.
- Soorunami atualerlaat atuarneq ilikkaruttulerlugu atuartuuneq augustimiit misigivaat. Taavalu decembarip tungaanut atuartuuneq atuarfimmukartarneq sammisarlugu. Suliluunniit pulaffiginagu allamut nuunneq malunnangaatsiassooq aamma atuartunut, uatsinnut angajoqqaanullu minnerunngitsumik, taanna oqarpoq.
Aaqqiigallarneq qanoq sivisutigiumaarnersoq suli ilisimaneqanngitsoq pisortap tullersortaasa oqaatigaat.
