Kommuneqarfik Sermersooq inuussutissarsiornermut nutaamik periusissiaqalissasoq
Kommuneqarfik Sermersooq nutaamik inuussutissarsiornermut 2027-mi periusissiaqalissaaq.
Kommuni tusagassiuutinut nalunaarummi taama allappoq.
- Kommuneqarfik Sermersuumi nukissarpassuaqarpugut, piginnaasarpassuaqarpugut isumassarsiatsialannillu peqarluta, borgmesteri Avaaraq Olsen (IA) tusagassiuutinut nalunaarummi allappoq:
- Najukkami naleqarnerulersitsisinnaasunik aamma kommunip Kalaallit Nunaatalu avataanut anngussinnaasunik suliffeqarfinnik, suliffinnik nioqqutissanillu pilersitsinissamut ajornannginnerulersitsisussamik najoqqutassiornissaq suliassaraarput.
Kommunip nalunaaruteqarneratut, inuussutissarsiornermut periusissiassaq atuutsinneqalerpat suliffeqarfioreersunut najoqqutassaqarnerulersitsissaaq, nutaanik suliniuteqartoqarsinnaassaaq siunissamilu suliffissaqartitsinerulissalluni.
Inuussutissarsiornermik ineriartortitsinissaq Nuummi taamaallaat pissanngitsoq
Inuussutissarsiornermut periusissiassaq Nuummi taamaallaat atuutsinneqassanngilaq. Avaaraq Olsenip oqarnera naapertorlugu illoqarfiit nunaqarfiillu nukittuffiinik periarfissaqartitsinerannillu atuilluarnissaq pineqarpoq:
- Nuummi, Paamiuni, Tasiilami, Ittoqqortoormiini aamma nunaqarfitsinni ineriartortitsineq assigiinngissinnaavoq. Taamaattumik najukkami periarfissat aallaavigissavagut, Avaaraq allappoq:
- Pigeriikkatsinni qanoq naleqarnerulersitsisinnaanitsinnik aamma aningaasaleerusuttunut, suliffeqarfimmik pilersitserusuttunut imaluunniit suliffeqarfioreersumik ineriartortitserusuttunut qanoq kommunimit tapersiiviginnissinnaanermik takunnillaqqinnerusariaqarpugut.
Tusagassiuutinut nalunaarummi, inuussutissarsiornermi atugassarititaasut ukiuni tulliuttuni allanngoriartortinneqarnissaat, erseqqissaatigineqarpoq:
- Mittarfiit atassuteqarfiillu nutaat, nukissiuutinut ataavartunut tunngasutigut ineriartorneq aamma digitalinngortitsineq suli ingerlanneqartoq nutaanik periarfissaqalersitsissapput, tusagassiuutinut nalunaarummi allassimavoq:
- Tamannalu aamma kommunimut piumasaqaateqarfiuvoq. Inuussutissarsiuteqarnermik ineriartortitsinermut eqqortunik najoqqutassiaqassaaq aamma kommunimit siunissami inuussutissarsiornermi piginnaasat sulisullu suut pisariaqartinneraat eqqumaffigineqassapput.
Periusissiassap aalajangersimasumik imarisaa tusagassiuutinut nalunaarummi allassimanngilaq.
Ineriartortitsinermut illu nutaaq
Kommuneqarfik Sermersuup, Paamiuni ineriartortitsinermut illumik ammaasoqartoq, sapaatip akunnerata siuliani saqqummiuppaa.
Illu innuttaasut isumassarsiaannut, nutaaliornerannut, tunisassiornermut inuussutissarsiornermilu periarfissarsiornissamut atorneqassaaq.
Avaaraq Olsenip ukiortaami oqalugiaammini, kommunip inuussutissarsiornerup iluani politikkiliorusunnera erseqqissaatigaa: ’aallarnisaasunut, najukkami suliffeqarfinnut kommunillu siuariartorneranut tamakkiisumik tapersersuisoq ineriartortikkusullugu.
Takornariartitsinerullu kommunimut periarfissiinera oqaatigalugu:
- Nuummi mittarfik nutaaq takornarianik nutaanik siornatigullu takornariartartunit allaanerusunik amerlanerusunillu tikilluaqqusiffiusalereerpoq, tamannalu periarfissanik nutaanik pilersitsivoq, Avaaraq Olsenip ukiortaami oqalugiaammini oqaatigaa.
